36 il qarnında “əkiz uşağı” ilə yaşadı: Əməliyyat zamanı ŞOK GÖRÜNTÜ

Hindistanlı Sanju Bhagat uzun illərdir qarnında böyük bir kütlə ilə yaşayırdı. Həkimlər əvvəlcə onun ciddi bir şişdən əziyyət çəkdiyini düşünürdülər. Lakin 1999-cu ildə aparılan əməliyyat zamanı həqiqət üzə çıxdı.
Bhagat həmin il ciddi nəfəsalma problemi ilə Hindistanın Naqpur şəhərində xəstəxanaya müraciət edib. Müayinələrdən sonra həkimlər qarın boşluğundakı nəhəng kütlənin çıxarılması üçün əməliyyat qərarı veriblər.

Lakin cərrahlar əməliyyat zamanı qeyri-adi mənzərə ilə qarşılaşıblar. Kütlənin daxilində sümüyə, ətraflara və insan bədəninin müxtəlif hissələrinə bənzəyən inkişaf etmiş strukturlar aşkarlanıb.

Mütəxəssislər bunun son dərəcə nadir inkişaf anomaliyası olan “fetus in fetu” — yəni “döl daxilində döl” vəziyyəti olduğunu müəyyən ediblər.

Bu nadir halda əkizlərdən birinin inkişafının çox erkən mərhələsində formalaşan toxumalar digər əkizin bədənində sıxışıb qala bilər. Zamanla həmin toxumalar sümük, qol və ya ayaq kimi bədən strukturlarına bənzər şəkildə inkişaf edə bilir. Bununla belə, söhbət normal şəkildə inkişaf edən və müstəqil yaşaya bilən döldən getmir.

Sanju Bhagatın hadisəsi xüsusilə diqqət çəkib. Çünki onun bədənində qalan strukturlar nisbətən inkişaf etmiş görünüşə malik olub və hadisə dünya mediasında böyük maraq doğurub.

“Fetus in fetu” olduqca nadir rast gəlinən vəziyyətdir. Əksər hallarda uşaqlıq dövründə aşkarlansa da, bəzi hallarda heç bir ciddi əlamət yaratmadan illərlə, hətta yetkinlik dövrünə qədər gizli qala bilər.

Sanju Bhagat isə təxminən 36 il ərzində bədənində belə qeyri-adi inkişaf qalığı olduğunu bilmədən yaşayıb. Həkimlərin əvvəlcə nəhəng şiş hesab etdiyi kütlənin əslində nadir inkişaf anomaliyası olduğu əməliyyat zamanı məlum olub.

Hadisə insan embrional inkişafının nə qədər mürəkkəb və qeyri-adi ola biləcəyini göstərən ən maraqlı tibbi nümunələrdən biri kimi yadda qalıb.

Xpress.az