Basqalda musiqi və sənətkarlıq festivalı keçirilib - FOTO
Azərbaycanın qədim və zəngin mədəni irsə malik Basqal qəsəbəsində “Basqal Musiqi və Sənətkarlıq Festivalı” keçirilib.
Xpress.az xəbər verir ki, festival Basqalın tarixi-mədəni mühitində musiqi, sənətkarlıq və turizmi bir araya gətirərək həm yerli sənətkarların yaradıcılığının nümayişinə, həm də qəsəbənin turizm potensialının tanıdılmasına mühüm töhfə verib.
Tədbir çərçivəsində iştirakçılar müxtəlif musiqi proqramlarını, sənətkarlıq nümunələrini və Basqalın özünəməxsus mədəni atmosferini yaxından yaşamaq imkanı əldə ediblər.
Festivalda gənc rəssam Aydan Abdullazadənin və tələbələrinin rəsm əsərləri nümayiş etdirilib. Sərgidə təqdim olunan əsərlər gənc istedadların yaradıcılıq imkanlarını nümayiş etdirməklə yanaşı, festivalın sənət və yaradıcılıq istiqamətini də zənginləşdirib.
Tədbirdə, həmçinin Göyçay Gənclər Evinin əməkdaşları və könüllüləri tərəfindən rəqs nümunələri təqdim olunub. Milli rəqs nümunələri festivalın musiqi və mədəni proqramına xüsusi rəng qataraq iştirakçılara Azərbaycan xalqının zəngin folklor ənənələrini nümayiş etdirib.
Festival Basqalın tarixi-mədəni irsinin qorunması, yaradıcı gənclərin və sənətkarların fəaliyyətinin dəstəklənməsi, eləcə də mədəni tədbirlərin turizmin inkişafına inteqrasiyası baxımından əhəmiyyətli tədbir kimi yadda qalıb.
Ərturan İSMAYIL
