“Sea Breeze Construction” şirkətinin dövlətə vergi borcu yaranıb

“Sea Breeze Construction” Məhdud Məsuliyyətli Cəmiyyətin dövlətə borcu yaranıb.

Yurd.Media-nın əldə etdiyi məlumata görə, Azərbaycanda fəaliyyət göstərən və əsasən tanınmış iş adamı Emin Ağalarova məxsus irimiqyaslı Sea Breeze Resort layihəsinin tikinti və infrastruktur işlərini həyata keçirən əsas podratçı şirkətlərdən biri olan “Sea Breeze Construction”ın 79 min manat vergi borcu yığılıb.

Qeyd edək ki, şirkət Bakı şəhəri, Sabunçu rayonu, Nardaran şossesi ünvanında hüquqi qeydiyyatdan keçib. Son illərdə həm Xəzər sahili kurort zonasında premium daşınmaz əmlakın inşasını davam etdirir, həm də işğaldan azad edilmiş ərazilərdə dövlət əhəmiyyətli genişmiqyaslı tikinti layihələrinin qalibi qismində çıxış edir.

Belə ki, “Sea Breeze Construction”ın əsas fəaliyyəti Bakıda 1000 hektardan çox ərazini əhatə edən kurort şəhərciyinin inşasıdır. Bura çoxmənzilli premium yaşayış kompleksləri, otellər, villalar və müxtəlif əyləncə-iaşə obyektlərinin tikintisi daxildir.

"Sea Breeze Construction" Qarabağ və Şərqi Zəngəzurun da bərpası üzrə dövlət tenderlərində fəal iştirak edir. Şirkət Qubadlı şəhərində müasir yaşayış məhəlləsinin tikinti-quraşdırma işləri üzrə 34.4 milyon manatlıq dövlət tenderinin qalibi seçilib.

Şirkət Qarabağ bölgəsində 2 kəndin tam olaraq yenidən tikilməsi və infrastrukturunun qurulması məqsədilə təxminən 112 milyon manat dəyərində iri müqavilələr əldə edib.

Nizamnamə kapitalı 50 manat olan şirkətin direktoru Elbəy Rzayevdir.