Birinciləri məktəbə NECƏ ÖYRƏŞDİRƏK? - Təhsildə XARİCİ TƏCRÜBƏ + FOTO
Hər il I və V sinfə başlayan şagirdlərin yeni məktəb mühitinə uyğunlaşması prosesində müəyyən çətinliklər müşahidə olunur. Xüsusilə tədrisin ilk həftələrində müəllimlər həm təlim prosesini təşkil etmək, həm də şagirdlərin yeni mühitə, müəllimlərə və sinif yoldaşlarına uyğunlaşmasını təmin etmək kimi iki mühüm vəzifəni paralel şəkildə həyata keçirməli olurlar.
Bu baxımdan, Türkiyədə tətbiq edilən “Adaptasiya həftəsi” maraqlı təcrübələrdən biri hesab oluna bilər.
Tədris ili başlamazdan əvvəl I sinfə başlayan şagirdlər üçün 5 günlük, V sinfə başlayan şagirdlər üçün isə 3 günlük uyğunlaşma proqramı təşkil edilir. Bu müddətdə şagirdlər valideynlərinin iştirakı ilə məktəb mühiti ilə tanış olur, müxtəlif oyunlara, yaradıcı fəaliyyətlərə və layihələrə cəlb edilirlər. Əsas məqsəd uşağın tədris prosesinə başlamazdan əvvəl məktəbi təhlükəsiz və doğma mühit kimi qəbul etməsinə şərait yaratmaqdır.
Proqramda valideynlərin iştirakı da xüsusi əhəmiyyət daşıyır. Dövlət sektorunda çalışan valideynlərdən birinə övladının uyğunlaşma prosesində iştirak edə bilməsi üçün gündə 3 saatdan çox olmamaqla inzibati icazə verilməsi nəzərdə tutulur.
Maraqlı yanaşmalardan biri də I sinif şagirdləri üçün xüsusi hazırlanmış “Övladımla Məktəbə İlk Addım Dəftəri”dir. Bu dəftər vasitəsilə uşaqlar ailələri ilə birlikdə həyata keçirdikləri fəaliyyətləri və ilk məktəb təcrübələrini qeyd edir, birlikdə öyrənir və təhsil həyatlarının ilk günlərinə dair xatirələr toplayırlar.
Düşünürəm ki, bu yanaşmanın ölkəmizin ümumtəhsil müəssisələrində də tətbiqi və ya pilot şəkildə sınaqdan keçirilməsi şagirdlərin yeni təhsil mərhələsinə daha rahat uyğunlaşmasına, valideyn-məktəb əməkdaşlığının gücləndirilməsinə və müəllimlərin tədris ilinə daha sistemli başlamasına müsbət töhfə verə bilər.
Surət MEHDİYEV
