Dövlət Agentliyinə 7 ayda təbii inhisarçılarla bağlı 774 müraciət daxil olub
Bu ilin yanvar-iyul aylarında təbii inhisarçılarla bağlı Prezident yanında Antiinhisar və İstehlak Bazarına Nəzarət Dövlət Agentliyinə 774 müraciət daxil olub.
Xpress.az xəbər verir ki, bunu Dövlət Agentliyinin şöbə müdiri Şəmsi Rzalı qurumun təşkil etdiyi "Haqsız rəqabət sahəsində tənzimləmələr və təbii inhisar sahəsində dövlət nəzarəti" adlı tədbirdə bildirib.
Onun sözlərinə görə, bunun 221-i təmin olunub: "Təmin olunma o deməkdir ki, həmin təbii inhisar subyekti yol verdiyi hərəkətdən vaz keçib. Burada, əlbəttə ki, müştəriyə qaytarılan 6 min manat vəsait də var. Müraciətlərin 215-i elektrik enerjisi təchizatı, 156-sı qaz təchizatı, 110-u içməli su təchizatı, 61-i hava yolu nəqliyyatı, 60-ı dəmir yolu nəqliyyatı xidməti, 52-si digər xidmətlər, 51-i rabitə xidməti, 48-i istilik enerjisi təchizatı, 11-i kanalizasiya təchizatı, 6-sı poçt xidməti, 4-ü nəqliyyat xidmətinin payına düşüb. Müraciətlər əsasında 5 araşdırma başladılıb və 2-si haqqında iş qaldırılıb".
