Xınalıq yolunda sürüşmə ilə bağlı RƏSMİ AÇIQLAMA - VİDEO
Xınalıq kənd yolunda yaranmış vəziyyətlə bağlı Azərbaycan Avtomobil Yolları Dövlət Agentliyi (AAYDA) açıqlama verib.
Qurumdan Xpress.az-a bildirilib ki, sözügedən ərazidə yamacda baş vermiş sürüşmə nəticəsində yolun hərəkət hissəsinin daralması müşahidə olunub.
"Mövcud problemin aradan qaldırılması və hərəkətin təhlükəsizliyinin təmin edilməsi məqsədilə yolun dağ yamacı istiqamətində genişləndirilməsi işləri həyata keçirilir.
İşlərin icrası zamanı xüsusi texnikanın fəaliyyəti ilə əlaqədar olaraq müəyyən qaya və torpaq parçaları yolun hərəkət hissəsinə düşüb. Genişləndirmə işləri aparıldıqca həmin hissələrin təmizlənməsi də mərhələli şəkildə həyata keçirilir və hazırda ərazidə təmizləmə işləri davam etdirilir.
Ərazidə hər iki istiqamət üzrə müvafiq xəbərdaredici və istiqamətləndirici yol nişanları quraşdırılıb, hərəkət iştirakçıları alternativ marşrut kimi Alpan-Susay-Xınalıq yolu istiqamətinə yönləndiriliblər.
Bununla yanaşı, görülən işlərlə bağlı yerli icra strukturları, bələdiyyə nümayəndələri və yol polisi əvvəlcədən məlumatlandırılıb. Təəssüf ki, bəzi vətəndaşlar quraşdırılmış xəbərdaredici nişanlara və alternativ istiqamətləndirməyə baxmayaraq, bilərəkdən işlərin aparıldığı ərazidən keçməyə cəhd edib və prosesi videoya qeydə alıblar. Nəticədə sözügedən xoşagəlməz vəziyyət yaranıb", - deyə AAYDA-dan bildirilib.
Agentlik sürücülərdən təhlükəsizlik tələblərinə riayət etmələrini, xəbərdaredici nişanları nəzərə almalarını və işlər yekunlaşanadək alternativ olaraq Alpan-Susay-Xınalıq avtomobil yolundan istifadə etmələrini xahiş edib.
