Tikinti ərazisində jurnalist TƏHDİD OLUNDU: YASAMALDA ÖZBAŞINALIQ - VİDEO
Bakıda ikimərtəbəli yaşayış evinə üçüncü mərtəbə artırılır. Lakin tikinti ərazisi hasarlanmayıb və təhlükəsizlik toru çəkilməyib. Piyadalar tikintinin altından keçərək gündəlik alış-veriş etdikləri ərzaq mağazasına gedirlər.
Xpress.az "Xəzər" TV-yə istinadən xəbər verir ki, söhbət paytaxtın Yasamal rayonu, Kamil Əliyev küçəsində yerləşən yaşayış evindən gedir.
Sakinlər iddia edirlər ki, hər gün keçdikləri bu ərazidə aparılan tikinti zamanı təhlükəsizlik qaydalarına riayət olunmur.
Çəkiliş qrupu tikintini aparan şəxsin məsələyə münasibət bildirməsi üçün təxminən 40 dəqiqə gözləyib. Lakin ev sahibinin əvəzinə onun qonşuları çəkiliş qrupunu təhdid ediblər.
Ərazi polis bölməsinin əməkdaşları həmin şəxsi ərazidən uzaqlaşdırıblar.
Daha sonra tikintini aparan şəxs çəkiliş qrupuna yaxınlaşaraq torpağa dair çıxarışının olduğunu bildirib. Lakin tikintiyə icazəsinin olub-olmaması və təhlükəsizlik tədbirlərinə riayət edilib-edilməməsi ilə bağlı sualları cavablandırmayıb.
O, çəkiliş aparıldığına görə jurnalistləri təhdid də edib.
Yasamal Rayon İcra Hakimiyyətindən bildirilib ki, yaşayış evinin çıxarışı var. Lakin ikinci və üçüncü mərtəbələrin tikintisinə hansı qurum tərəfindən icazə verildiyi araşdırılır.
