Sərnişinlərin səbrini sınayan marşrutlar - 193 və 211 nömrəli avtobuslar niyə gecikir?
Sentyabrın gəlişi ilə sərnişinlərin paytaxtdakı ictimai nəqliyyatla bağlı narazılıqları artmağa başlayıb. Xüsusilə 193 və 211 saylı avtobuslardan istifadə edən sərnişinlər uzun-uzadı avtobus gözləməkdən təngə gəliblər. Bildirilir ki, avtobuslar arasında interval bəzən 30-40 dəqiqəyə çatır.
Səhər saatlarında işə və dərsə tələsən sərnişinlərin bu qədər uzun müddət dayanacaqda gözləməsi isə ciddi narahatlıq yaradır.
İctimai nəqliyyatın əsas məqsədi, xüsusilə də ayrıca avtobus xətləri çəkildikdən sonra vətəndaşların vaxtında mənzil başına çatmasını təmin etmək olduğu halda, belə uzun intervallar haqlı olaraq iradlar doğurur.
Nəzərə alsaq ki, hazırda Bakı Metropoliteninin fəaliyyətində məhdudiyyətlər var, bu da sərnişinləri daha çox yerüstü nəqliyyata yönləndirir. Amma ya avtobusların sayının az olması, bəzən texniki problemlər, bəzən də marşrut xətti üzərində aparılan təmir işləri gecikmələrə səbəb olur.
“BakuBus”-ın mətbuat xidmətindən Bizim.Media-ya bildirildi ki, MMC-nin istismarında olan 211 nömrəli müntəzəm marşrut xətti üzrə sərnişindaşıma fəaliyyəti ümumilikdə 14 avtobusla təmin edilir və xətt üzrə 14-15 dəqiqəlik intervalla həyata keçirilir.
Günün səhər və axşam pik saatlarında marşrutun keçdiyi Həsən bəy Zərdabi, Əbdülvahab Salamzadə və Fətəli xan Xoyski küçələrində, həmçinin 3-cü mikrorayon dairəsi ərazisində müşahidə edilən nəqliyyat sıxlığı avtobuslararası intervallarda müvəqqəti artıma səbəb ola bilir.
Pik saatlarda nəqliyyat sıxlığı ilə əlaqədar avtobusların hərəkət intervalında yaranan müvəqqəti dəyişikliklərlə bağlı sərnişinlərdən anlayış göstərmələri xahiş olunur.
Digər 193 saylı avtobusa da anlayış göstərmək məqsədilə onun da gecikmə səbəbini öyrənmək istədik. Azərbaycan Yerüstü Nəqliyyat Agentliyindən (AYNA) sorğumuza cavab olaraq bildirildi ki, sözügedən avtobus “ÇinarTrans” şirkətinə məxsusdur. Adıçəkilən daşıyıcı şirkətlə isə əlaqə yaratmaq mümkün olmayıb.
