Vaşinqtondan İrəvana ŞOK dəstək
Birləşmiş Ştatların Ermənistanın silahlı qüvvələrində genişmiqyaslı islahatlar aparmaqda və ordunun transformasiyasında ona açıq şəkildə hərbi dəstək göstərəcəyini bəyan etməsi regionda gərginliyi maksimum həddə çatdırıb. İrəvanda keçirilən növbəti Ermənistan-Amerika müdafiə məsləhətləşmələri zamanı ABŞ müdafiə nazirinin müavini Endryu Lumis tərəfindən səsləndirilən bu iddialı açıqlamalar rəsmi Vaşinqtonun Cənubi Qafqazda yeni hərbi-siyasi maraqlar güddüyünü açıq şəkildə nümayiş etdirir. Sentyabrın 18-də baş tutan qapalı görüşdə tərəflər ikitərəfli hərbi əməkdaşlıq proqramlarını müzakirə ediblər və Lumis bildirib ki, Birləşmiş Ştatlar Ermənistan ordusunun yenidən qurulması üçün məsləhət proqramları, hərbi təcrübə mübadiləsi və müxtəlif transformasiya layihələrini intensiv şəkildə davam etdirəcək. Hətta məsləhətləşmələrdən dərhal sonra hər iki ölkənin nümayəndə heyətlərinin bu istiqamətdə xüsusi protokol imzalaması diqqətdən yayınmayıb. Bəs Vaşinqtonun İrəvanı açıq şəkildə silahlandırması və ordu quruculuğuna dəstək verməsi fonunda ABŞ Bakı ilə də analoji hərbi məsləhətləşmələr aparırmı, yoxsa qardaş Türkiyə kimi güclü müttəfiqin olduğu bir coğrafiyada Azərbaycanın ümumiyyətlə belə "yardımlara" ehtiyacı yoxdur?
Məsələ ilə bağlı NOCOMMENT.az-a açıqlama verən tanınmış hərbi ekspert Ramil Məmmədli qeyd edib ki, ABŞ-nin Ermənistan ordusunda islahat adı altında həyata keçirdiyi bu fəaliyyətlər regionda sülhə deyil, əksinə, yeni eskalasiyalara xidmət edir və Vaşinqtonun Cənubi Qafqazda gərginlik ocağı saxlamaq siyasətinin tərkib hissəsidir:
"ABŞ-nin Ermənistanın hərbi potensialını artırmağa çalışması və ordu quruculuğuna dəstək verməsi heç də təsadüfi deyil; bu, İrəvanı gələcəkdə yeni təxribatlara həvəsləndirmək məqsədi daşıyır. Vaşinqton yaxşı başa düşür ki, məğlub Ermənistan ordusunun modernləşdirilməsi adı altında həyata keçirilən bu addımlar bölgədə qüvvələr balansını pozmağa və Azərbaycanı təzyiq altında saxlamağa hesablanıb. Lakin rəsmi Bakı üçün bu cür kənar müdaxilələr heç bir hərbi təhlükə yaratmır. Azərbaycanın özündə peşəkar, qüdrətli və döyüş təcrübəsinə malik müzəffər ordusu var, üstəgəl, dünyanın ən güclü hərbi qüvvələrindən biri olan qardaş Türkiyə ilə strateji müttəfiqlik münasibətlərimiz mövcuddur. Türkiyə kimi qüdrətli qardaş dövlətin dəstəyinin və öz gücümüzün olduğu yerdə Azərbaycanın kənar dövlətlərin şübhəli hərbi məsləhətlərinə və ya yardımlarına heç bir ehtiyacı yoxdur".
Ekspertin sözlərinə görə, ABŞ-nin Azərbaycanla Ermənistana yanaşmasında hər zaman dərin ikili standartlar mövcud olub və Vaşinqton heç vaxt rəsmi Bakı ilə Ermənistana göstərdiyi kimi birtərəfli hərbi dəstək xarakterli məsləhətləşmələr aparmayıb:
"Azərbaycan hər zaman müstəqil xarici və hərbi siyasət yürüdüb, öz təhlükəsizliyini daxili resursları və qardaş Türkiyə ilə qırılmaz hərbi əməkdaşlıq çərçivəsində təmin edib. ABŞ-nin İrəvanda imzaladığı hərbi protokollar və göstərdiyi dəstək isə əslində Ermənistanı növbəti dəfə böyük geosiyasi oyunların qurbanına çevirməkdir. Azərbaycan ordusu regionda istənilən təhdidin qarşısını dərhal almaq qüdrətindədir və Qərbin bu cür birtərəfli addımları reallığı dəyişə bilməz".
