“Belə qeyrətli cavanlar çoxalsa...” - Tanınmış həkimdən Gülarənin qətli ilə bağlı ŞOK PAYLAŞIM
Özünü psixoterapevt-həkim və elmi-lədun bilicisi kimi təqdim edən, 39 kitabın müəllifi olduğunu bildirən Paşa Yaqubun sosial şəbəkədəki paylaşımı ciddi müzakirələrə səbəb olub.
Xpress.az musavat.com-a istinadla xəbər verir ki, o, Bakıda 23 yaşlı gənc rəssam Gülarə Mehdiyevanın qətlə yetirilməsi ilə bağlı yazdığı şərhdə cinayətə haqq qazandıran mövqe sərgiləyib.

Paşa Yaqub öz paylaşımında “Belə qeyrətli cavanlar çoxalsa, bəlkə pozğunluğun qarşısı alınar” ifadəsini işlədib.
O, paylaşımının şərh bölməsində Gülarənin qardaşının ondan sosial şəbəkələrdəki açıq-saçıq şəkillərini silməyi tələb etdiyini, gənc qızın isə bundan imtina etdiyini üçün öldürüldüyünü yazıb.

Xatırladaq ki, 2003-cü il təvəllüdlü Gülərə Mehdiyevanın qətli ilə bağlı xəbərlər ictimaiyyətdə geniş rezonans doğurub. Gənc qadının şəxsi həyatına və sosial şəbəkə paylaşımlarına görə öldürülməsinə haqq qazandıran yanaşma isə ayrıca müzakirə mövzusuna çevrilib.
Qadının geyimi, şəxsi həyatı və sosial şəbəkə paylaşımları heç kimə onun həyatına qəsd etmək hüququ vermir. Qətlin hansı səbəbdən törədilməsindən asılı olmayaraq, cinayətə haqq qazandırmaq cəmiyyətdə zorakılığın normallaşmasına xidmət edə bilər.

Bu yanaşma diqqət çəkən məqamlarla yanaşı, ciddi suallar da doğurur. Belə ki, şəxsin sosial şəbəkədəki fəaliyyəti, geyimi, şəxsi həyatı və ya ailə üzvləri ilə münasibətləri heç bir halda onun həyatına qəsd edilməsinə bəraət qazandıra bilməz.
Xüsusilə də özünü elm, tibb və mənəvi bilik sahibi kimi təqdim edən şəxslərin belə həssas məsələlərdə səsləndirdiyi fikirlər ictimai məsuliyyət baxımından əhəmiyyət daşıyır. Qadın qətlinə “qeyrət” donu geyindirmək və zorakılığı guya cəmiyyətdəki hansısa problemin həlli kimi təqdim etmək təhlükəli yanaşmadır.
Gülarə Mehdiyevanın qətli ilə bağlı hüquqi qiyməti istintaq və məhkəmə verməlidir. Lakin heç bir şəxsi mülahizə və ya iddia qətlin bəraət qazandırılması üçün əsas ola bilməz.
Paşa Yaqubun paylaşımı isə qadınlara qarşı zorakılıq, ailədaxili münasibətlər və cəmiyyətdə formalaşan yanlış düşüncə tərzi ilə bağlı müzakirələri bir daha gündəmə gətirib.