Tarixin bu günü...
2020-ci ilin bu günündə Azərbaycan Ordusu bir sıra strateji kəndləri azad edib.
2020-ci ilin bu günündə — oktyabrın 23-də Azərbaycan Silahlı Qüvvələri Vətən müharibəsi zamanı Cəbrayıl, Xocavənd, Zəngilan və Qubadlı rayonlarında yerləşən bir sıra yaşayış məntəqələrini Ermənistanın işğalından azad edib.
Prezident, Silahlı Qüvvələrin Ali Baş Komandanı İlham Əliyev həmin gün rəsmi tvitter hesabında paylaşım edərək, ordumuzun böyük uğurlar qazandığını və aşağıdakı kəndlərin azad olunduğunu elan etmişdi:
Xocavənd rayonu: Dolanar, Bünyadlı
Cəbrayıl rayonu: Dağ Tumas, Nüsüs, Xələfli, Minbaşılı, Veysəlli
Zəngilan rayonu: Vənədli, Mirzəhəsənli
Qubadlı rayonu: Zilanlı, Kürd Mahrızlı, Muğanlı və Alaqurşaq
Bu əməliyyatlar nəticəsində Azərbaycan Ordusu Cənub istiqamətində irəliləyərək, mühüm strateji yüksəklikləri və nəqliyyat yollarını nəzarətə götürüb. Beləliklə, Cəbrayıl və Zəngilan rayonları istiqamətindəki hücum əməliyyatları Qubadlıya doğru yeni cəbhə xətti açıb və bölgədə strateji üstünlüyü tam şəkildə Azərbaycanın xeyrinə dəyişib.
O dövrdə Müdafiə Nazirliyi bildirirdi ki, azad olunan kəndlərdə erməni hərbi birləşmələrinin xeyli sayda canlı qüvvəsi və texnikası məhv edilib, Azərbaycan bayrağı isə bu ərazilərdə ucaldılıb.
Bu qələbə Vətən müharibəsinin növbəti mərhələsində mühüm dönüş nöqtəsi kimi tarixə düşdü. Azad edilən kəndlər Azərbaycanın ərazi bütövlüyünün bərpası istiqamətində atılan ardıcıl və planlı addımların bir hissəsi idi.
