"Tramp artıq müharibə yolundadır”- Medvedevdən sərt bəyanat

ABŞ-ın Rusiyaya qarşı yeni sanksiyalar tətbiq etməsi və ABŞ prezidenti Donald Trampın rusiyalı həmkarı ilə Budapeştdə planlaşdırılan görüşü ləğv etməsi “müharibə aktı” kimi qiymətləndirilib.

Xpress.az xəbər verir ki, bu barədə Rusiya Təhlükəsizlik Şurasının sədr müavini Dmitri Medvedev öz Telegram kanalında yazıb.

“ABŞ bizim düşmənimizdir və onların danışıqlı ‘sülhməramlısı’ artıq Rusiyaya qarşı müharibə yoluna qədəm qoyub. Bu, artıq onun münaqişəsidir”, — Medvedev qeyd edib.

O bildirib ki, ABŞ-ın qərarları və Trampın bəyanatları Rusiyaya “lazımsız danışıqlara vaxt itirmədən, Banderanın gizləndiyi bütün yerləri müxtəlif silahlarla vurmağa” əsas verir.

“Qələbə masa arxasında deyil, döyüş meydanında qazanılmalıdır. Düşmənləri məhv etməklə, mənasız ‘sövdələşmələr’ bağlamaqla deyil”, — siyasətçi əlavə edib.

Oktyabrın 22-də axşam ABŞ Maliyyə Nazirliyi “Rusiyanın sülh prosesinə ciddi maraq göstərmədiyini” əsas gətirərək “Rosneft”, “LUKOIL” və onların törəmə şirkətlərinə qarşı yeni sanksiyalar paketi tətbiq edib.

Tramp daha sonra Moskvanı dərhal atəşkəsə çağırıb və “artıq çoxdan gözlədiyimizi” bildirib. Bununla yanaşı, ABŞ dövlət katibi Marko Rubio Vaşinqtonun Moskva ilə dialoqda maraqlı olduğunu vurğulayıb.

ABŞ prezidenti həmçinin Budapeştdə Rusiya prezidenti Vladimir Putinlə planlaşdırılan görüşün təxirə salındığını açıqlayıb.

“Sadəcə olaraq bunun doğru zaman olmadığını düşündüm. İstədiyimiz nəticəyə hələ çatmamışdıq”, — Tramp bəyan edib.

Oktyabrın 16-da telefon danışığı zamanı Tramp və Putin Budapeştdə görüş keçirmək barədə razılığa gəlmişdilər, lakin dəqiq tarix müəyyən olunmamışdı.

Oktyabrın 21-də Financial Times və The Telegraph yazmışdı ki, sammitin ləğvi qərarı Marko Rubio ilə Rusiya xarici işlər naziri Sergey Lavrov arasında oktyabrın 20-də baş tutan telefon danışığından sonra qəbul edilib.