“Uğur bəxtlə deyil, sistemli yanaşma və intizamla qazanılır” -Ekspertlə Müsahibə
Tarixən ölkəmizdən kənarda yaşayan bir çox həmvətənlərimiz fəaliyyətləri ilə Azərbaycanın adını dünyaya tanıdıblar. Belə şəxslərdən biri də Rusiyada yaşayan azərbaycanlı sahibkar, “Implant52” stomatoloji klinikalar şəbəkəsinin təsisçisi və baş direktoru, cərrah və tibbi biznesin inkişafı üzrə mütəxəssis Yusif Əkbərovdur.
Uğurlu biznes fəaliyyəti, idarəetmə bacarığı və peşəkarlığı ilə seçilən Yusif Əkbərov Xpress.az-a verdiyi müsahibədə xaricdə uğur qazanmağın yollarından və şəxsi təcrübəsindən danışıb.
– Siz artıq bir neçə ildir ki, xaricdə yaşayırsınız və orada uğurlu biznes qurmağa nail olmusunuz. Hər kəs bu səviyyəyə çata bilmir. Sizcə, bu daha çox bəxtin payıdır, yoxsa peşəkarlığın? Eləcə də izləyicilərimizlə xaricdə uğurlu biznes qurmağın sirlərini bölüşməyinizi istərdik.
– Düzünü desəm, mən bəxtə inanmıram. Bəxt bəlkə bir dəfə gətirə bilər. Amma sabit və uğurlu biznes qurmaq, xüsusilə də xarici ölkədə, artıq bəxt deyil. Bu, xarakter, intizam və sistemli yanaşmanın nəticəsidir. Mən işə başlayanda nə investorum var idi, nə də start kapitalım. Cəmi 20 min rubl və bir məqsədim vardı — sübut etmək ki, stomatologiya dürüst, şəffaf və müasir ola bilər. Addım-addım irəlilədim: öyrəndim, iş proseslərini qurdum, komanda formalaşdırdım, xidmət standartları yaratdım ki, insanlar qayğını və etibarı hiss etsinlər. Mənim üçün uğurun sirri sadədir: insanları dinləməyi bacarmaq və olduğun yerdə faydalı olmaq lazımdır. Əgər başqa ölkəyə gəlmisənsə, onun mədəniyyətini öyrən, mentalitetini anla, adət-ənənələrinə hörmət et. Özünü zorla qəbul etdirməyə çalışma, dəyər təqdim et. İnsanlar sənin səmimi olduğunu, məqsədinin sadəcə pul qazanmaq deyil, yaratmaq olduğunu görəndə sənə inanmağa başlayırlar. Və mənim fikrimcə, etibar dünyanın ən möhkəm valyutasıdır.
– Gələcək planlarınız nələrdir?
– Hazırda klinika şəbəkəmizi genişləndirmək, həmçinin tibbi xidmət sahəsində yeni texnologiyaları tətbiq etmək üzərində çalışırıq. Bununla yanaşı, Azərbaycanda da tibbi maarifləndirmə layihələri həyata keçirməyi planlaşdırıram. İstəyirəm ki, bu sahədə əldə etdiyim təcrübəni və bilikləri vətənimdəki həmkarlarımla paylaşım. Afaq Qurbanzadə
