"Bu qidalar zəhərlidir" - HƏKİM MƏSLƏHƏTİ

Müəyyən qidaları yeməyə qarşı güclü istək bəzən orqanizmdə qida maddələrinin çatışmazlığını və ya bəzi xəstəliklərin inkişafını göstərə bilər.

Xpress.az xəbər verir ki, bu barədə terapevt Regina Sadıkova Gazeta.Ru-ya verdiyi müsahibədə məlumat verib.

Onun sözlərinə görə, şirniyyata qarşı qarşısıalınmaz həvəs çox vaxt maqnezium və ya xrom çatışmazlığının göstəricisi ola bilər.

“Bu minerallar beynin həzz mərkəzlərinin fəaliyyətində mühüm rol oynayır”, – deyə Sadıkova izah edib.

Duzlu qidalara meyl isə, həkimin fikrincə, stress, adrenal tükənmə və ya güclü fiziki fəaliyyət nəticəsində natriumun əhəmiyyətli dərəcədə itirilməsi ilə əlaqədar yaranır.

Yemək vərdişlərini normallaşdırmaq üçün Sadıkova bağırsaq fəaliyyətini yaxşılaşdırmağa yönəlmiş, kifayət qədər liflə zəngin və balanslaşdırılmış pəhriz saxlamağı tövsiyə edir. O, həmçinin bağırsaq mikroflorasının bərpası üçün probiyotiklərin və faydalı bakteriyaların çoxalmasını dəstəkləyən prebiyotiklərin qəbulunu da vacib sayır.

Həkim əlavə edib ki, müəyyən qidalara qarşı davamlı və nəzarətsiz istək varsa, bu zaman orqanizmdə qida maddələrinin çatışmazlığı və ya digər sağlamlıq problemlərinin olub-olmadığını müəyyən etmək üçün həkim müayinəsindən keçmək tövsiyə olunur.

Qeyd edək ki, daha əvvəl NTR 24 bir endokrinoloqun çoxlu miqdarda göbələk istehlakının mümkün təhlükələri barədə xəbərdarlıq etdiyini bildirmişdi.