İflas edən şirkət 2160 işçini işdən ÇIXARDI 

İzmirin Menemen və Sasalı bölgələrində fəaliyyət göstərən TPI Kompozit, 5 aydır davam edən tətilin ardından iflasını elan edərək fəaliyyətlərini Dubay mənşəli XCS Composites şirkətinə devr etdiyini açıqlamışdı. Lakin indi daha da diqqətçəkən bir hadisə baş verib: şirkət 2 min 160 işçini toplu şəkildə işdən çıxardığını bildirib. Daha da maraqlısı isə bu bildirişin artıq idarəetməni təhvil almış XCS tərəfindən deyil, iflas etdiyini elan edən TPI Kompozit tərəfindən göndərilmiş olmasıdır.

Xpess.az xəbər verir ki, işçilərin baş nümayəndəsi Polat baş verənlərə kəskin reaksiya verərək bildirib: “İşçilərə qarşı adeta bir oyun oynanır.” Onun sözlərinə görə, bu vəziyyətdə işçilərin hüquqlarının necə qorunacağı və prosesin necə davam edəcəyi hələ də qeyri-müəyyəndir.

TPI Kompozit zavodlarında çalışan və Petrol Kimya Qauçuk İşçiləri Həmkarlar İttifaqına (Petrol-İş) üzv olan işçilər, toplu əmək müqaviləsi danışıqlarında razılaşma əldə olunmadığı üçün 13 may tarixində istehsalı dayandıraraq tətilə başlamışdılar. Həmkarlar ittifaqı maaş artımı tələblərini 120 faiz olaraq təyin etmiş, işəgötürən isə ilkin olaraq sadəcə 30 faiz artım təklif etmişdi. Tətilin gedişatında bu təklif 80 faizə qədər yüksəldilmiş, lakin işçilər bu təklifi də kifayət hesab etməyərək tətili davam etdirmişdilər.

Nəhayət, 10 oktyabr axşamı 2 min 160 işçiyə işdən çıxarıldıqları barədə bildirişlər göndərilib. Bu işdən çıxarılmaların 9 noyabra qədər tamamlanması planlaşdırılır.

İşçilərə göndərilən rəsmi sənəddə belə yazılıb:

“Aylardır yeni sifarişlər alınmadığından istehsal dayanmışdır və yaxın gələcəkdə də sifarişlərin alınması mümkün görünmür. Cari iqtisadi vəziyyət çərçivəsində işçi xərclərini qarşılayacaq vəziyyətdə deyilik və artıq işçi sayı ehtiyacdan artıqdır. Bu səbəbdən iqtisadi və əməliyyat baxımından toplu şəkildə işçilərin işdən çıxarılması həyata keçiriləcəkdir.”