Evdə şam yandıranlara pis xəbər: Mütəxəssislər ciddi sağlamlıq riskləri barədə xəbərdarlıq edir
Dəbli ev dekorasiyasının ayrılmaz hissəsinə çevrilən ətirli və rəngli şamların göründüyü qədər zərərsiz olmadığı məlum olub. Mütəxəssislər bildirirlər ki, evdə şamların tez-tez yandırılması sağlamlıq üçün təhlükəli nəticələrə səbəb ola bilər.
Xpress.az xəbər verir ki, Dr. Əmir Xan vurğulayıb ki, “Bir şam yandırmaq sizi öldürməz, lakin şamların müntəzəm və çox istifadə olunması bədənə zərər verə biləcək maddələr yayır.”
Həkimin sözlərinə görə, şam yandıqda havaya uçucu oksidləşdirici birləşmələr qarışır. Bu maddələr çox kiçik hissəciklərdən ibarətdir və nəfəs yolu ilə bədənə daxil olaraq iltihab və uzunmüddətli stres yarada bilər.
“Şamları atmayın, amma ehtiyatla istifadə edin”
Dr. Xan qeyd edib ki, şamları tamamilə həyatınızdan çıxarmağa ehtiyac yoxdur, lakin onların istifadəsini orta səviyyədə saxlamaq vacibdir. O, şam yandırılan otağın mütləq şəkildə havalandırılmasını tövsiyə edir.
Alternativ təhlükəsiz variantlar
Mütəxəssislər vurğulayırlar ki, evdə xoş qoxu yaratmaq üçün mütləq şamdan istifadə etməyə ehtiyac yoxdur. Bunun əvəzinə:
qamış diffuzorları,
efir yağı diffuzorları
kimi yanma prosesi tələb etməyən və daha təhlükəsiz hesab edilən vasitələrdən istifadə etmək olar.
