Üz rəngini boğan görünməz səbəb – hava çatışmazlığı
Əksər qadınlar müasir kosmetologiyanın bütün imkanlarından yararlansalar da, yaş artdıqca üz rənginin tündləşməsinin qarşısını almaqda çətinlik çəkirlər. Bəs bu problemin əsas səbəbi nədir və onun aradan qaldırılması üçün nə etmək olar? Mövzu ilə bağlı təbii gəncləşmə üzrə ekspert Afaq Qurbanzadə Xpress.az-a danışıb.
Ekspert bildirir ki, üz rənginin tündləşməsinin ən gözdən qaçan, lakin əsas səbəblərindən biri təmiz havada kifayət qədər olmamaqdır.
Təmiz hava çatışmazlığının yaratdığı fəsadlar
Gün ərzində havasız, az oksigenli qapalı məkanda uzun müddət qalmaq qanda oksigen səviyyəsinin bir qədər aşağı düşməsinə səbəb olur. Bu isə dəridə solğun, cansız və “boğulmuş” görüntü yaradır.
Həmçinin bu cür mühit qan dövranını zəiflədir və nəticədə üzdə tünd kölgələr, tutqun rəng və gözaltı qaralmaları əmələ gəlir. Təmiz hava çatışmazlığı eyni zamanda stressi artırır, yorğunluq və baş ağrısı yaradır ki, bu da dərinin rəngini daha mat göstərir.
Afaq Qurbanzadənin sözlərinə görə, fiziki olaraq havasızlıq mühüm rol oynasa da, üz rənginin tündləşməsinə təsir edən əsas amillər bunlardır:
Qan azlığı (anemiya)
D vitamini çatışmazlığı
Yorğunluq, stress və yuxusuzluq
Alergiyalar
Qan dövranının zəifləməsi
Aşağı qan təzyiqi
Su azlığı (dehidrasiya)
Üz rəngini necə yaxşılaşdırmaq olar?
Üz dərisinin canlanması üçün gündəlik sadə vərdişlər kifayət qədər effekt verir:
Hər gün 30–60 dəqiqə təmiz havada gəzinti
Otaqların mütəmadi havalandırılması
Kifayət qədər su qəbulu
Qanda D vitamini və dəmir səviyyəsinin yoxlanılması
Normal yuxu rejiminin bərpası
Ən vacib 3 analiz
Üz rənginin tutqunlaşmasının tibbi səbəblərini dəqiq müəyyən etmək üçün ekspert aşağıdakı analizlərin verilməsini vacib sayır:
1. Ümumi qan analizi (ÜQA / OAK)
– Solğunluğun ən geniş yayılmış səbəbi qan azlığıdır. Hemoglobin və eritrosit göstəriciləri bunu dəqiq göstərir.
2. Ferritin (dəmir anbarı)
– Dəmir çatışmazlığı üzün tutqun və "boğulmuş" görünməsinin ən çox rast gəlinən səbəbidir. Bu səbəbdən təkcə dəmir yox, ferritin də mütləq ölçülməlidir.
3. Vitamin D və ya alternativ olaraq Vitamin B12
– Hər iki vitamin çatışmadıqda qan dövranı zəifləyir, dəri rəngi solğunlaşır, yorğunluq artır. Xüsusilə Vitamin D çatışmazlığı çox yayılmışdır və nəzarətdə saxlanmalıdır.
Nəticədədə tələb olunan analizlər verildikdən sonra düzgün rekomendasiyalara əməl etmək və həyat tərzində kiçik dəyişikliklər etmək üz rənginin bərpasına ciddi şəkildə kömək edir. Afaq Qurbanzadə əlavə edir ki, üz idmanının gündəlik həyata daxil edilməsi qan dövranını gücləndirir, şişi azaldır və dəriyə lazımi maddələrin çatmasını sürətləndirərək üz rəngini nəzərəçarpacaq dərəcədə yaxşılaşdırır.
