ÜST: Qəzzanın uşaqlarının sağalması daha uzun çəkəcək

Ümumdünya Səhiyyə Təşkilatının (ÜST) baş direktoru Tedros Adhanom Ghebreyesus bildirib ki, Qəzzada əldə edilən atəşkəs iki illik hücumlardan sonra uşaqlara müəyyən dərəcədə rahatlıq gətirsə də, onların sağalma prosesinin uzun çəkəcəyi gözlənilir.

Xpress.az xəbər verir ki, Ghebreyesus ABŞ-da yerləşən X sosial media platformasında Dünya Uşaqların Müdafiəsi Günü münasibətilə Qəzzadakı uşaqlar haqqında paylaşım edib.

O, atəşkəsin bölgədə iki illik zorakılıqdan sonra uşaqlara bir qədər sakitlik bəxş etdiyini, kövrək atəşkəsin onlara nəfəs almaq, oynamaq və hətta sağalmağa başlamaq üçün fürsət yaratdığını vurğulayıb.

Ghebreyesus əlavə edib ki, travma, yaralanmalar, kədər və “qırılmış uşaqlıqların” sağalması isə daha çox vaxt tələb edəcək.

ÜST-nin Qəzzada səhiyyə sisteminin bərpası və yenidən qurulmasını dəstəklədiyini bildirən Ghebreyesus, təşkilatın uşaqlar üçün psixi sağlamlıq xidmətlərinin genişləndirilməsi istiqamətində sahədə fəaliyyət göstərdiyini qeyd edib.

“Bu gün Dünya Uşaqların Müdafiəsi Günüdür. ÜST atəşkəsə tam riayət olunmasına və bunun davamlı sülhə gətirib çıxarmasına çağırır”, – deyə o bildirib.