Telefon fırıldaqçıları 168 nəfəri aldadıb: 20 nəfər...

Novosibirskdə telefon vasitəsilə vətəndaşları aldadan mütəşəkkil fırıldaqçı dəstəsinə hökm oxunub. Cinayətkarlar özlərini bank, kuryer və digər təşkilatların əməkdaşları kimi təqdim edərək insanları pul köçürməyə razı salıblar. Nəticədə zərərçəkənlərə 9 milyon rubldan çox maddi ziyan dəyib.

Novosibirsk Vilayət Prokurorluğunun məlumatına görə, 20 nəfərdən ibarət qrup Rusiyanın müxtəlif bölgələrində yaşayan vətəndaşlara zəng edərək onları aldadıb. Fırıldaqçılar guya güzəştli şərtlərlə kredit ayrılacağını bildirib, bunun üçün komissiya və digər ödənişlərin əvvəlcədən köçürülməsini tələb ediblər.

Vətəndaşlar pulları cinayətkarlar tərəfindən təqdim edilən uydurma şəxslərin bank hesablarına göndəriblər. Lakin vəsaitlər çıxarıldıqdan sonra heç bir kredit təqdim olunmayıb.

İstintaq zamanı müəyyən edilib ki, bu cinayət əməlləri nəticəsində 168 nəfər zərər çəkib. Fırıldaqçılar dəymiş ziyanın 2 milyon rubldan çox hissəsini qismən kompensasiya ediblər.

Məhkəmənin qərarı ilə təqsirləndirilən şəxslərdən üç nəfər ümumi rejimli cəzaçəkmə müəssisəsində 3 il 6 aydan 6 ilədək azadlıqdan məhrum edilib. Qalan 17 nəfərə isə 1 il 10 aydan 3 il 8 aya qədər şərti cəza verilib.

Məhkəmə zərərçəkənlərin mülki iddialarını da təmin edib.

Xpress.az