Payız gəldi, saçlar tökülməyə başladı - Səbəbi bu ola bilər
Payız gələn kimi bir çox insan saç darağında, yastıqda və duşdan sonra əvvəlkindən daha çox saç görməyə başlayır. Bəziləri bunu havaların soyuması, bəziləri isə vitamin çatışmazlığı ilə əlaqələndirir. Bəs həqiqətən payız saç tökülməsini artırırmı?
Elmi araşdırmalar insan saçının böyümə və tökülmə prosesində mövsümi dəyişikliklərin olduğunu göstərir. Saç follikulları il ərzində eyni ritmdə fəaliyyət göstərmir və bəzi dövrlərdə daha çox saç “istirahət” mərhələsinə keçir.
Saçın həyat dövrü əsasən üç mərhələdən ibarətdir: böyümə, keçid və istirahət. İstirahət mərhələsi başa çatdıqda saç tökülür və follikul yeni saçın böyüməsinə hazırlaşır.
1991-ci ildə aparılan araşdırmada sağlam kişilərin saç dövrü 18 ay ərzində izlənilib. Tədqiqat zamanı saçların böyümə mərhələsində olan follikulların payının sentyabr ayında ən aşağı səviyyəyə düşdüyü, tökülən saçların sayının isə avqust-sentyabr aylarında artdığı müşahidə edilib. Araşdırmada həmin dövrdə gündəlik orta saç tökülməsinin qış ayları ilə müqayisədə iki dəfədən çox olduğu bildirilib.
Daha geniş araşdırmalardan biri isə 823 sağlam qadının altı il ərzində aparılmış trixoqram məlumatlarını əhatə edib. Nəticələrdə saçların “telogen”, yəni istirahət mərhələsində olma faizinin yay aylarında yüksəldiyi, daha sonra isə mövsümi tökülmənin artdığı müəyyənləşdirilib. Yaz aylarında da ikinci, lakin daha zəif mövsümi dəyişiklik müşahidə olunub.
