Azərbaycan startapı süni intellekt əsaslı “SUALCAVAB” təhsil köməkçisi yaratmağı planlaşdırır
“EZ İnnovativ Həllər” MMC V–XI sinif şagirdləri üçün fəaliyyət göstərən SUALCAVAB.COM onlayn sınaq platformasına süni intellekt texnologiyalarının inteqrasiyasını planlaşdırır. Şirkətin əsas hədəfi hazırda şagirdlərin nəticələrini təhlil edən və mövzu boşluqlarını müəyyənləşdirən platformanı onları düzgün cavaba istiqamətləndirən öyrərədici və interaktiv eyni adlı (“SUALCAVAB”) təhsil çatbotu ilə təkmilləşdirməkdir.
Yeni texnologiyanın imkanları, layihənin təhsil sahəsinə gətirəcəyi yeniliklər və investisiya ehtiyacı barədə “EZ İnnovativ Həllər” MMC-nin direktoru, SUALCAVAB layihəsinin rəhbəri Ziya Rəcəbli Mediaservis.az-ın suallarını cavablandırıb.
– Ziya müəllim, əvvəlcə SUALCAVAB.COM platforması haqqında məlumat verməyinizi istərdik.
– SUALCAVAB.COM V–XI sinif şagirdlərinə biliklərini yoxlamaq, mövzu boşluqlarını müəyyənləşdirmək və inkişaflarını izləmək imkanı verən yerli onlayn sınaq platformasıdır. Platformada 92 dərslik üzrə sınaqlar təqdim olunur və Azərbaycanın müxtəlif bölgələrindən 80-ə yaxın müəllim layihədə iştirak edir.
SUALCAVAB-ın əsas fərqi ondan ibarətdir ki, şagird sınağın tərkibini özü formalaşdırır. O, sinfini və fənlərini seçərək fərdi sınaq səbəti yaradır. Platforma şagirdin zəif və güclü tərəflərini müəyyənləşdirir, nəticələri əsasında istiqamətləndirici analitik təhlillər təqdim edir.
Şagird səhvlərini öyrəndikdən sonra əlavə ödəniş etmədən istədiyi sayda təkrar sınaq verə bilər. O, 100 faiz nəticə əldə etdikdə isə platformadan “Uğur sertifikatı” alır.
Məqsədimiz şagirdə yalnız neçə bal topladığını göstərmək deyil. Biz onun hansı mövzuları bildiyini, hansı mövzularda boşluqlarının olduğunu və inkişaf etmək üçün nə etməli olduğunu göstərmək istəyirik.
– Süni intellektin SUALCAVAB-a tətbiqi nəzərdə tutulur?
– Növbəti inkişaf mərhələsində süni intellekt əsaslı “SUALCAVAB” təhsil çatbotunun yaradılmasını planlaşdırırıq. Bu, adi sual-cavab proqramı olmayacaq. Çatbot şagirdə hazır cavabı vermək əvəzinə onun düşünməsinə, səhvini tapmasına və düzgün nəticəyə mərhələli şəkildə çatmasına kömək edəcək.
Məsələn, şagird sınaqda səhv etdiyi sualla bağlı çatbota müraciət edə biləcək. Sistem onun cavabını, sualın mövzusunu və əvvəlki nəticələrini nəzərə alaraq səhvin səbəbini izah edəcək, yönləndirici suallar verəcək və zəruri hallarda həmin mövzu üzrə əlavə çalışmalar tövsiyə edəcək.
Şagird yalnız “Düzgün cavab nədir?” sualına cavab almayacaq. O, “Harada səhv etdim?”, “Bu mövzunu necə öyrənə bilərəm?” və “Nəticəmi necə yaxşılaşdıra bilərəm?” kimi suallar üzrə fərdi dəstək əldə edəcək.
– Çatbot müəllimi əvəz edəcəkmi?
– Xeyr. Bizim yanaşmamıza görə, süni intellekt müəllimi əvəz etməməli, onun imkanlarını genişləndirməlidir. Təhsildə əsas rol yenə müəllimə məxsusdur.
Çatbot müəllimlərin hazırladığı və yoxladığı məzmun əsasında şagirdə əlavə dəstək göstərəcək. Müəllim isə şagirdlərin nəticələrini, mövzu boşluqlarını və inkişaf dinamikasını daha ətraflı görə biləcək. Beləliklə, texnologiya müəllimlə şagird arasındakı tədris prosesinin daha fərdi və səmərəli təşkilinə kömək edəcək.
– Yeni sistem şagirdlərə konkret olaraq nə verəcək?
– Əsas üstünlük fərdiləşdirilmiş dəstək olacaq. Bir sinifdə bütün şagirdlər eyni mövzunu eyni sürətlə mənimsəmirlər. Biri qaydanı bilir, lakin tətbiq edə bilmir, digəri diqqətsizlikdən, başqa bir şagird isə mövzunu tam anlamadığı üçün səhv edir.
Planlaşdırdığımız çatbot bu fərqləri nəzərə alaraq hər bir şagirdə uyğun istiqamət verəcək. Sistem şagirdin nəticələri əsasında:
- səhvin ehtimal olunan səbəbini izah edəcək;
- hazır cavabı vermədən düzgün həllə istiqamətləndirəcək;
- mövzu üzrə əlavə suallar təklif edəcək;
- əvvəlki və cari nəticələri müqayisə edəcək;
- fərdi öyrənmə planı və inkişaf tövsiyələri hazırlayacaq;
- öyrənmə prosesini günün istənilən vaxtında davam etdirməyə imkan verəcək.
Bu yanaşma sınağı yalnız qiymətləndirmə vasitəsi olmaqdan çıxararaq öyrənmə prosesinin davamına çevirə bilər.
– Süni intellektin yanlış məlumat verməsi riski necə idarə olunacaq?
– Təhsil sahəsində süni intellektin tətbiqi böyük məsuliyyət tələb edir. Ümumi təyinatlı çatbotun internetdəki müxtəlif məlumatlara əsaslanaraq sərbəst cavab yaratması bizim üçün uyğun model deyil.
“SUALCAVAB” çatbotunun müəllimlər tərəfindən hazırlanmış, yoxlanılmış və dərslik mövzularına uyğunlaşdırılmış kontent əsasında işləməsini nəzərdə tuturuq. Cavabların etibarlılığı, şagirdin yaşına uyğunluğu, məlumatların qorunması və müəllim nəzarəti layihənin əsas prinsiplərindən olacaq.
Biz süni intellekti nəzarətsiz cavab mənbəyi deyil, etibarlı müəllim kontenti ilə şagird arasında ağıllı əlaqə vasitəsi kimi görürük.
– Layihənin həyata keçirilməsi üçün hansı dəstəyə ehtiyacınız var?
– SUALCAVAB hazırda yerli imkanlar və məhdud resurslarla inkişaf etdirilən EdTech startapıdır. Süni intellekt əsaslı çatbotun yaradılması proqram təminatının hazırlanması, süni intellekt modellərinin inteqrasiyası, məlumat bazasının strukturlaşdırılması, server infrastrukturu, kibertəhlükəsizlik, pedaqoji ekspertiza və pilot sınaqlar üçün əlavə maliyyə tələb edir.
Bu səbəbdən layihənin növbəti mərhələsinə keçmək üçün investisiya dəstəyinə ehtiyacımız var. Təhsil texnologiyalarına, süni intellektə və sosial təsir yaradan layihələrə maraq göstərən investorlar, fondlar və korporativ tərəfdaşlarla əməkdaşlığa açığıq.
Bu investisiya yalnız bir texnoloji məhsulun hazırlanmasına deyil, Azərbaycan dilində keyfiyyətli rəqəmsal təhsil ekosisteminin inkişafına xidmət edəcək.
– İnvestor üçün SUALCAVAB-ın əsas üstünlüyü nədir?
– SUALCAVAB yalnız ideya mərhələsində olan layihə deyil. Artıq işləyən platformamız, formalaşmış məhsul modelimiz, müəllim komandamız, dərsliklər üzrə strukturlaşdırılmış kontentimiz və real istifadə təcrübəmiz var.
Süni intellektin inteqrasiyası mövcud platformanın növbəti texnoloji inkişaf mərhələsidir. Bu yenilik məhsulun miqyasını, istifadəçi üçün yaratdığı dəyəri və gələcək inkişaf imkanlarını əhəmiyyətli dərəcədə genişləndirə bilər.
Biz yerli tədris proqramını, Azərbaycan müəllimlərinin təcrübəsini və müasir süni intellekt texnologiyalarını vahid platformada birləşdirmək istəyirik. Bu model gələcəkdə digər ölkələrin təhsil sistemlərinə uyğunlaşdırılaraq regional bazarlara da çıxarıla bilər.
– Layihənin əsas məqsədini bir cümlə ilə necə ifadə edərdiniz?
– SUALCAVAB hazırda şagirdin zəif və güclü tərəflərini təhlil edir və nəticələr əsasında istiqamətləndirici analitik məlumatlar təqdim edir. Platformanın süni intellektə inteqrasiyası ilə hər bir şagird üçün fərdi öyrənmə planı və inkişaf tövsiyələri hazırlanacaq.
Məqsədimiz şagirdə yalnız nəticəsini göstərən deyil, səhvini anlamağa, bilik boşluqlarını doldurmağa və uğura doğru irəliləməyə kömək edən fərdi rəqəmsal təhsil köməkçisi təqdim etməkdir.
“EZ İnnovativ Həllər” MMC-nin planlaşdırdığı süni intellekt əsaslı “SUALCAVAB” təhsil çatbotu reallaşdırılacağı halda, yerli təhsil texnologiyaları sahəsində mühüm yeniliklərdən birinə çevrilə bilər. Şirkət layihənin texnoloji inkişafı və geniş auditoriyaya çatdırılması üçün yerli və xarici investorlarla əməkdaşlığa hazır olduğunu bildirir.
“Oxuduğun fənni bildiyindən əmin ol.”
- MƏKTƏBLİ ÖVLADI OLAN VALİDEYNLƏRİN NƏZƏRİNƏ!
SUALCAVAB platformasında ŞAGİRDİN BİLİYİNİ ÖYRƏN, TƏHLİL ET VƏ NƏTİCƏ ÇIXAR!
Platformada qeydiyyatdan keçərək "ELM" promokodundan istifadə etməklə hazırkı kampaniyadan faydalana bilərsiniz. Promokodu ödənişdən əvvəl daxil etdikdə istənilən paket 20% endirim ilə təqdim olunur. Promokod: ELM
Ətraflı məlumat və istifadə qaydası ilə bağlı SUALCAVAB komandası WhatsApp vasitəsilə sizə dəstək göstərəcək. - www.sualcavab.com
WhatsApp: +994 10 526 82 79 - Instagram: onlayn_sualcavab
