Peşə məktəblərində təhsil alanların

Dövlət tərəfindən yaradılan peşə təhsili müəssisələrində Pedaqoji Şuranın yaradılması, səlahiyyətləri və fəaliyyət qaydaları müəyyənləşib.

Yeni qaydalara əsasən, cəzaçəkmə müəssisələrinin nəzdində fəaliyyət göstərən peşə təhsili müəssisələri və xüsusi peşə təhsili müəssisələri istisna olmaqla, dövlət peşə təhsili müəssisələrinin Pedaqoji Şurası ali idarəetmə orqanı hesab olunur.

Şura ictimai əsaslarla fəaliyyət göstərir və işini aşkarlıq, şəffaflıq, kollegiallıq və qərəzsizlik prinsipləri əsasında qurur.

Şuranın əsas vəzifələri nələrdir?

Pedaqoji Şura müəssisədə təhsil prosesinin təşkili və inkişafı, təhsilin keyfiyyətinin artırılması, təhlükəsiz və inklüziv təhsil mühitinin yaradılması, eləcə də təhsilalanların və müəllimlərin həvəsləndirilməsi ilə bağlı məsələləri müzakirə edir və müvafiq qərarlar qəbul edir.

Şura, həmçinin işəgötürənlərlə əməkdaşlığın genişləndirilməsi, müasir tədris üsullarının və istehsalat yeniliklərinin tətbiqi, müəssisənin maddi-texniki bazasının gücləndirilməsi və maliyyə-təsərrüfat məsələləri ilə bağlı təklifləri nəzərdən keçirir. Bundan başqa, tam orta təhsil üzrə buraxılış imtahanlarının və buraxılış imtahanı keçirilməyən fənlər üzrə illik qiymətləndirmələrin nəticələri müzakirə olunur. Təhsilalanların nəticələrinin yaxşılaşdırılması üçün tədbirlər müəyyən edilir.

Şura müəssisənin nizamnaməsinə dəyişiklik edilməsi, ödənişli təhsil üzrə təhsil haqları və büdcədənkənar vəsait hesabına təqaüdlərin təsis edilməsi ilə bağlı da təkliflər verə bilər.

Şuranın tərkibinə müəssisənin direktoru, direktor müavinləri, filial müdiri (olduğu halda), ümumtəhsil fənləri üzrə tədris hissə müdiri, baş usta, kitabxanaçı, korpus rəhbəri və istehsalat üzrə menecer (olduğu halda), eləcə də qanunvericilikdə nəzərdə tutulan təhsilverənlər daxil edilir.

Şuraya müəssisənin direktoru rəhbərlik edir, tədris və təlim işləri üzrə direktor müavini isə sədr müavini olur. Şuranın tərkibi hər tədris ilinin əvvəlində direktorun əmri ilə təsdiqlənir. İclaslara təhsilalanlar, valideynlər, işəgötürənlər, əmək bazarının nümayəndələri, ekspertlər və müzakirə olunan məsələlərlə bağlı digər şəxslər də dəvət oluna bilərlər.

Qaydalara əsasən, Pedaqoji Şuranın iclasları tədris ili ərzində azı dörd dəfə keçirilməlidir. İclasın səlahiyyətli sayılması üçün üzvlərin ən azı üçdə ikisinin iştirakı tələb olunur.

Qərarlar iclasda iştirak edən üzvlərin sadə səs çoxluğu ilə qəbul edilir. Səslər bərabər olduqda sədrin səsi həlledici sayılır. Səsvermə zamanı üzvlərin bitərəf qalmasına icazə verilmir.

Növbədənkənar iclas sədrin təşəbbüsü və ya Şura üzvlərinin ən azı üçdə birinin yazılı müraciəti əsasında çağırıla bilər. İclasın gündəliyi və müvafiq materiallar üzvlərə ən azı üç iş günü əvvəl göndərilməlidir.

Şuranın qərarları protokolla rəsmiləşdirilir və müəssisənin direktoru tərəfindən təsdiqlənir. Qərarlar iclasdan sonra ən geci üç iş günü ərzində üzvlərə göndərilir.

Pedaqoji Şuranın qərarlarının icrası müəssisə və onun rəhbəri üçün məcburidir. Təhsil prosesinin iştirakçılarının hüquq və vəzifələrinə aid olan, qanunvericiliklə açıqlanması məhdudlaşdırılmayan qərarlar müəssisənin rəsmi internet saytında və ya digər vasitələrlə elan edilir.

Prosedur pozuntusu ilə qəbul edilən və ya qanunvericiliyə zidd olan qərarlar müəssisənin tabe olduğu dövlət orqanı tərəfindən ləğv edilə bilər. Şuranın qərarlarından inzibati qaydada və ya məhkəməyə müraciət etməklə şikayət vermək mümkündür.