Görkəmli anatom-alim, zabitəli pedaqoq, xeyirxah müəllim -

Azərbaycan Tibb Universitetinin İnsan anatomiyası və tibbi terminologiya kafedrasının dosenti, yarım əsrdən artıq bir müddətdə müəllim və tələbə kontingentinin hörmət və ehtiramını qazanan, tədris etdiyi fənnin vurğununa çevrilən şan-şöhrətli Qasımov Şöhrət İbrahim oğlunun gül ətirli həyat çələnginin 80 illik yubileyidir. Bu möhtəşəm yubileyin əks-sədaları onun uzun illərdən bəri yetişdirib boya-başa çatdırdığı, dərin etimadlarını qazandığı, xeyir-dua verib həvəslə əsl sınaq meydanına – həyat məktəbinə yola saldığı istəkli tələbələrinin timsalında dünyanın hər yerindən gəlir. Öz sənətinin virtuoz ifaçısı, fədakar təbliğatçısı, füsunkar memarı olan Şöhrət müəllimin pərəstişkarları ona dərin rəğbət hissləri bəsləyir, onun rəvan yollarını yeni şəfəqlərlə işıqlandırır, vətən naminə yerinə yetirdiyi mükəmməl işlərini eyni mükəmməlliklə həmahəng şəkildə davam etdirirlər.

Ş.İ.Qasımov 1946-cı il noyabrın 14-də Azərbaycanın laləzar guşələrindən olan Şəmkir rayonunun Muxtariyyə (İndiki - Qədim Qala) kəndində dünyaya göz açıb. O, orta məktəbi bitirdikdən sonra 1966-1972-ci illərdə Nəriman Nərimanov adına Azərbaycan Dövlət Tibb İnstitutunun Pediatriya fakültəsinin tələbəsi olub, 1971-1974-cü illərdə - hələ tələbə ikən indiki Azərbaycan Tibb Universitetinin Tələbə Həmkarlar İttifaqı Komitəsinin sədri vəzifəsində çalışıb, 1972-ci ildə sözügedən ali təhsil ocağının Pediatriya fakültəsini bitirib və həmin ilin avqust ayının 28-də ATU-nun Elmi Şurasının qərarı ilə İnsan anatomiyası kafedrasında baş laborant kimi işə başlayıb, 1973-cü ildə kafedranın assistenti, 1978-ci ildə - baş müəllimi kimi fəaliyyət göstərib, 1993-cü ildə kafedranın dosenti seçilib və indiyə kimi böyük müvəffəqiyyətlə həmin vəzifədə çalışır. Görkəmli pedaqoq hazırda ATU-nun müxtəlif fakültələrində Azərbaycan bölməsində indiki 1-ci kurs tələbələrinə təcrübə məşğələləri keçir, nümunəvi mühazirələr oxuyur, bütün bunlarla yanaşı, mütəmadi olaraq açıq təcrübə dərsləri və açıq mühazirələr aparır.

Şöhrət müəllim kafedrada uğurla yerinə yetirdiyi elmi-tədqiqat işlərinin müvəffəq nəticəsi kimi 1988-ci il sentyabrın 26-da Tbilisi Dövlət Tibb İnstitutunun Dissertasiya şurasında “ Müxtəlif yaş dövrlərində boyun kələfinin makromikroskopik anatomiyası və sitomieloarxitektonikası” mövzusunda namizədlik dissertasiyası müdafiə edərək tibb elmləri namizədi elmi dərəcəsinə, 1994-cü il yanvarın 19-da isə dosent elmi adına layiq görülüb.

İstedadlı və yüksək səviyyəli təşkilatçılıq bacarığına malik olan alim 1991-2022-ci illərdə ATU-nun indiki İnsan anatomiyası və tibbi terminologiya kafedrasında kafedra müdirinin tədris işləri üzrə müavini vəzifəsini böyük uğurla, özünəməxsus fədakarlıqlarla yerinə yetirib.

Dosent Ş.İ.Qasımovun elmi-praktik yaradıcılığı, pedaqoji fəaliyyəti dolğun və zəngindir: belə ki, alim 150-dən çox çap olunmuş elmi və elmi-kütləvi əsərin, 15 dərsliyin, 14 tədris-metodiki vəsaitin müəllifi, eləcə də bütün türk dünyası miqyasında ilk dəfə olaraq işıq üzü görən “İnsan Anatomiyası Atlası” – adlı nadir kitabın həmmüəlliflərindəndir.

Şöhrət müəllimin yaradıcılıq fəaliyyətinin nəzərə çarpan vacib istiqamətlərindən biri də onun uzun illərdən bəri Azərbaycan Respublikasının Dövlət İmtahan Mərkəzində İnsan anatomiyası fənni üzrə ekspert qismində müvəffəqiyyətlə çalışmasıdır. O, bu istiqamətdə imtahan-test suallarının hazırlanmasında, müxtəlif proqramların tərtibində, tələbələrin sərbəst işlərinin qiymətləndirilməsində, məsləhət saatları zamanı onların suallarının diqqətli və dəqiq cavablandırılmasında yaxndan iştirak edərək tələbələrə əlverişli şərait yaradır, bu növ yanaşmalarla tədrisin keyfiyyətinin yaxşılaşdırılmasına layiqli töhfələr verir. Dosent Ş.İ.Qasımovun tələbələrlə apardığı iş üslubu, onlarınTələbə Elmi Cəmiyyəti xətti ilə tələbə elmi araşdırmalarına cəlb olunmalarının təşkili, həmçinin, tələbələrin işgüzarlıqla maarifləndirilmələri də sözsüz ki, təqdirəlayiq amillərdəndir.

Şöhrət müəllim, eyni zamanda, yüksək səviyyəli mədəniyyətə, səmimiyyətə, işgüzarlığa, özünəməxsus sadəliyə və təvazökarlığa malik əsl Azərbaycan ziyalısı, qürurlu və mətin Azərbaycan vətəndaşı kimi də tanınır. O, nüfuzlu bir şəxsiyyət olaraq həm elmi, həm də insani keyfiyyətlərin harmoniyasını özündə cəm edir, vahid inteqrasiya sisteminin mütəşəkkilliyinə əlverişli zəmin yaradır.

Kafedramızın gur işığının nur çırağına çevrilən, onun xoşbəxt gələcəyinə, rəvan yollarına tuşlanan rəşadətli Şöhrət müəllimi 80 illik şərəfli və şöhrətli yubileyi münasibətilə səmimiyyətlə təbrik edir, ona nümunəvi ailəsi ilə birlikdə möhkəm cansağlığı diləyir, gələcək işlərinin də mükəmməl icrasında yeni nailiyyətlər, yeni müvəffəqiyyətlər arzulayıram.

Mübariz Allahverdiyev

ATU-nun İnsan anatomiyası və tibbi terminologiya kafedrasının professoru, Birinci Qarabağ müharibəsi Veteranı, Əməkdar müəllim, “Qızıl Qələm” mükafatı və SSRİ “Sosializm yarışının Qalibi” Döş Nişanı laureatı, Respublika Jurnalistlər Birliyinin üzvü