İnci Mütəllimzadədən Türk-Azərbaycan dostluğuna həsr olunan MAHNI
Türk-Azərbaycan dostluğunu tərənnüm edən yeni mahnı dinləyicilərə təqdim olunub. Mahnını İnci Mütəllimzadə ifa edib. Mahnının sözləri Züveyir Durmaza, musiqisi Kübarə Bayramovaya məxsusdur. Klipin rejissoru isə Taleh Abdullazadədir.
Mahnının yaranma tarixçəsi də maraqlıdır. Türkiyədə yazılan mahnının sözləri İnci Mütəllimzadənin ifası üçün göndərilib. Daha sonra sözlər Kübarə Bayramovaya təqdim olunub və bəstəkar həmin mətnə musiqi bəstələyərək mahnını ərsəyə gətirib.
Türkiyə ilə Azərbaycan arasındakı qardaşlıq və dostluq münasibətlərini tərənnüm edən mahnıya çəkilən klip iki ölkənin mədəni yaxınlığını və ortaq mənəvi dəyərlərini əks etdirir.
Qeyd edək ki, İnci Mütəllimzadə Azərbaycan Dövlət Mədəniyyət və İncəsənət Universitetini (ADMİU) fərqlənmə diplomu ilə bitirib. O, Azərbaycan üzrə keçirilən səs yarışmalarının laureatı olub. Həmçinin Türkiyədə keçirilən festivalda 26 ölkə arasında Azərbaycanı uğurla təmsil edərək ölkəmizin mədəniyyətini beynəlxalq səviyyədə tanıdıb.
Türk şairinin sözləri, Kübarə Bayramovanın musiqisi və İnci Mütəllimzadənin ifası ilə ərsəyə gələn mahnı iki qardaş ölkə arasındakı dostluq münasibətlərinə musiqili töhfədir.
