Pirşağıda suiti cəsədləri aşkarlanıb - ÖZƏL
Pirşağıda dəniz sahilində yenidən suiti cəsədləri aşkarlanıb.
Xpress.az-ın sözügedən ərazidə olan əməkdaşının məlumatına görə, sahil boyunca bir neçə yerdə suiti cəsədləri var.
Sakinlər, eləcə də dəniz kənarına istirahət üçün gələn şəxslər cəsədlərin ətrafa yayılan qoxusundan narahatdırlar.
Qeyd edək ki, Xəzəryanı ölkələrin sahillərində Xəzər suitilərinin kütləvi ölümü tez-tez baş verir. Gah Qazaxıstan, gah Rusiya, gah da Azərbaycan sahillərində belə hallara rast gəlmək mümkündür.
Maraqlısı budur ki, suitilərin Xəzər dənizinin Azərbaycana aid akvatoriyasında olma müddətləri əsasən mart-aprel aylarıdır. Digər aylarda onlar şimal sahillərinə miqrasiya edirlər.
Xəzər suitisi suitilər içərisində Ginnesin Rekordlar Kitabına daxil olan ən kiçik ölçülü yırtıcı məməlidir. Son illərdə onların sayı azalmaqda davam edir.
