Mütəxəssislər Windows 10 istifadəçilərini təcili yeniləməyə çağırırlar
Windows istifadəçilərinə 2026-cı ilin ilk sistem yeniləməsini mümkün qədər tez quraşdırmaq tövsiyə olunur.
PCWorld-ün məlumatına görə, Windows 10-un köhnə versiyalarından istifadə edənlər üçün KB5073724 nömrəli yeniləmə artıq əlçatandır. Bu yeniləmə Windows 10-un 21H2 və 22H2 versiyaları, eləcə də Windows 10 Enterprise LTSC 2021 əməliyyat sistemi ilə işləyən kompüterlər üçün nəzərdə tutulub.
Yeniləməni əldə etmək üçün istifadəçilər Genişləndirilmiş Təhlükəsizlik Yeniləmələri (Extended Security Updates – ESU) proqramına qoşulmalıdırlar. Belə ki, Microsoft 14 oktyabr tarixindən etibarən bu versiyalar üçün standart yeniləmələrin təqdimatını dayandırıb. KB5073724 yeni funksiyalar əlavə etmir, lakin təhlükəsizlik baxımından vacib hesab olunur və şirkət onun tez bir zamanda quraşdırılmasını tövsiyə edir.
Mütəxəssislərin bildirdiyinə görə, yeniləmə Təhlükəsiz Önyükləmə (Secure Boot) funksiyasını aktivləşdirir. Bundan əlavə, sistemdən köhnəlmiş və potensial təhlükəli hesab olunan bir sıra drayverlər silinib:
agrsm64.sys (x64)
agrsm.sys (x86)
smserl64.sys (x64)
smserial.sys (x86)
Xatırladaq ki, Microsoft daha əvvəl Windows 11 əməliyyat sistemində quraşdırılmış Uzaqdan İş Masası (Remote Desktop) tətbiqinin dəstəyini dayandırdığını elan etmişdi. Sözügedən tətbiq 27 may 2025-ci il tarixindən etibarən əlçatan deyil. Bu proqram təhsil müəssisələrində və uzaqdan iş mühitlərində Windows əsaslı kompüterlərə məsafədən qoşulmaq üçün geniş istifadə olunurdu.
