Elektrikli çaydan təhlükəli ola bilər: Mütəxəssislər gizli riskləri açıqladı
Demək olar ki, hər mətbəxdə təhlükəli ola biləcək məişət cihazları var. Məsələn, bıçaq insanı kəsə, soba isə yandıra bilər. Lakin gündəlik istifadə etdiyimiz və çox vaxt təhlükəsiz hesab etdiyimiz bir cihaz da var ki, o, zamanla sağlamlığa zərər verə bilər. Bu, adi elektrik çaydanıdır.
Xüsusilə qış aylarında elektrik çaydanından tez-tez istifadə olunur. İsti çay gəzintidən sonra bizi isidir, işdə soyuqdan qoruyur və uzun qış axşamlarında demək olar ki, hər evdə istifadə olunur. Ancaq çox az insan bu cihazın içərisində hansı materialların istifadə olunduğunu düşünür.
Əsas risk – plastik material
Ən ucuz və ən çox yayılmış elektrik çaydanları plastikdən hazırlanır. Problem ondadır ki, plastik material hər gün qaynar su ilə birbaşa təmasda olur.
Bəzi ucuz modellərdə plastikin möhkəmliyini artırmaq üçün melamin adlı maddədən istifadə edilir. Bir sıra inkişaf etmiş ölkələrdə melaminin qida sənayesində istifadəsi qadağandır. Bu maddə az zəhərli hesab edilsə də, onun təhlükəsi ilə bağlı ciddi hadisələr də qeydə alınıb.
Məsələn, 2007-ci ildə ABŞ-da melaminlə çirklənmiş heyvan yemləri səbəbindən minlərlə it və pişik böyrək çatışmazlığından tələf olmuşdu.
Melamin bəzən qab-qacaq istehsalında istifadə olunur, lakin belə məhsulların üzərində adətən onların qızdırılmaması barədə xəbərdarlıq yazılır. Elektrik çaydanında isə su daim qaynadılır. Bu səbəbdən uzun müddət belə çaydanlardan istifadə edildikdə zərərli maddələrin suya keçməsi ehtimalı yaranır.
Şüşə çaydanlar da tam təhlükəsiz deyil
Bir çox insanlar şüşə çaydanların plastik modellərdən daha təhlükəsiz olduğunu düşünür. Bu qismən doğrudur, lakin burada da bəzi məqamlar var.
Bəzi şüşə çaydanlarda yalnız gövdə şüşədən hazırlanır, alt hissə isə metal olur. Şüşə və metalın birləşdiyi yerlər polimer materiallarla möhürlənir. Daimi qızdırılma zamanı bu polimerlər də müəyyən maddələr buraxa bilər.
Bundan əlavə, şüşə çaydanların əksəriyyətində qapaq plastikdən hazırlanır. Bu isə o deməkdir ki, qaynar su yenə də plastiklə təmasda olur.
Mütəxəssislər naməlum və ucuz markalı modellərin alınmasını tövsiyə etmirlər, çünki onların hansı materiallardan hazırlandığını müəyyən etmək çətindir.
Keyfiyyətli çaydanı necə seçmək olar
Keyfiyyətli çaydanlarda adətən təhlükəsizlik sistemi olur. Məsələn, çaydan dayaqdan götürülüb yenidən yerinə qoyulduqda cihaz avtomatik sönür.
Belə funksiyanın olmaması bəzən cihazın ən ucuz materiallardan hazırlandığını göstərə bilər.
Ən təhlükəsiz seçim – metal çaydanlar
Mütəxəssislərin fikrincə, ən təhlükəsiz variant metal çaydanlardır. Lakin burada da detallara diqqət yetirmək lazımdır. Qapağın da metal olması daha yaxşı hesab edilir.
Ən ideal modellər böyük termosu xatırladan, tamamilə metal korpusa və metal qapağa malik çaydanlardır. Bu halda su plastiklə demək olar ki, təmasda olmur.
Belə çaydanlar plastik modellərdən daha bahalı olsa da, sağlamlıq baxımından daha təhlükəsiz sayılır.
Yeni çaydan alarkən yalnız dizayn və qiymətə deyil, həm də cihazın hansı materialdan hazırlandığına diqqət yetirmək vacibdir. Çünki bu seçim ailənizin hər gün istifadə etdiyi suyun keyfiyyətinə birbaşa təsir edir.
Xpress.az
