Outlet geyimləri ilə bağlı həqiqətlər: Satılan məhsulların mənşəyi nədir?

Brend geyimləri daha münasib qiymətə almaq istəyənlərin üz tutduğu Outlet mağazaları ilə bağlı sosial şəbəkələrdə müxtəlif iddialar var. Bəzi istifadəçilər burada satılan məhsulların geyinilmiş olduğunu iddia edir. Başqa sözlə, “Second hand”in adı dəyişdirilmiş, yanıldıcı variantıdır.

Bu iddialar nə dərəcədə həqiqəti əks etdirir? Outlet mağazalarında satılan məhsulların mənşəyi nədir?

Şəhərin bir neçə Outlet mağazaları ilə məsələni araşdırdıq. Geyim üzrə mütəxəssislər diqqətə çatdırdılar ki, Outlet mağazalarında keçən kolleksiyalardan olan, satılmayıb anbarda qalmış mallar, qablaşdırması zədələnmiş və ya xırda defektli geyim və aksessuarlar satılır.

Mağazalardan onu da bildirdilər ki, alıcılarda geyinilmiş mal təəssüratının yaranmasına səbəb olan bir məqam var: 

Bəzi Outletlərdə alınıb bir-neçə gündən sonra müştəri tərəfindən geri qaytarılmış, yaxud vitrindən asıldığı üçün müştərilərin tez-tez üzərində yoxladığı məhsullar da ola bilər.

Belə hallarda müştəri onu geyinilmiş hesab edə bilər.

Həmçinin qeyd olundu ki, Outlet adı altında ikinci əl məhsullar satan kiçik mağazalar insanlarda qarışıqlıq yaradır. Lakin tanınmış geyim brendlərinin Outletləri mağazalar şəbəkəsinin nüfuzuna xələl gətirməməyə çalışırlar. İstənilən halda vətəndaşın şübhəsi yaranarsa, yerindəcə satış mütəxəssisinə iradını bildirməlidir.