Komitə ilə bağlı yeni qərar ETİRAZ DOĞURDU: Gözlənilənlərin tam əksinə olaraq... - FOTO

“Hökumət, deyəsən, qərar verib ki, insanların, biznesin, sahibkarların pozitiv gözləntilərinin əksinə olan nə varsa, həmin addımları atsın. Uzun zamandır müzakirə olunurdu ki, Azərbaycanda Dövlət Gömrük Komitəsinin ayrıca, müstəqil, özü də rütbəli məmurlardan ibarət olan qurum kimi fəaliyyətinə ehtiyac yoxdur. Çoxdan təklif var ki, Komitə ya Maliyyə, ya da İqtisadiyyat Nazirliyinə birləşdirilsin, hərbi rütbələr ləğv edilsin. Gömrük gözə görünməz, iş adamlarına mane olmayan, nazirliklərin birinin tərkibində departament kimi fəaliyyət göstərsin, bir çox səlahiyyətləri azaldılsın”.

Xpress.az xəbər verir ki, bu barədə iqtisadçı Natiq Cəfərli bildirib.

Onun sözlərinə görə, bəzi hökuməti dəstəkləyən deputatlar da bu təklifə isti baxdıqlarını publik çıxışlarında söyləyiblər.

İqtisadçı vurğulayıb ki, tam gözlənilənlərin əksinə olaraq, Gömrük Komitəsinin səlahiyyətlərini kəskin artıran yeni qərarlar qəbul edilir: “Amma və lakin Gömrük Komitəsinin səlahiyyətlərini kəskin artıran yeni qərarlar gəlir. Komitə bundan sonra iş adamlarına ölkədən çıxışa “stop” qoya biləcək, “brokerlər” anlayışını rəsmiləşdirərək, adını "dolayı gömrük təmsilçiliyi" qoyacaqlar, onların Komitə daxilində reyestri yaranacaq. Gömrük Komitəsi kimi istəsə həmin siyahıya salacaq, kim istəsə o siyahıdan çıxaracaq və fəaliyyətləri Gömrük Komitəsinin “iki dodağı” arasından keçəcək”.

N.Cəfərli Gömrük Komitəsinə əlavə “stop” düyməsini həvalə etməyin düzgün olmadığını qeyd edib: “Azərbaycan Respublikasının Konstitusiyası var, orada insanların səyahət sərbəstliyi maddəsi, bu maddənin dövlət tərəfindən qorunması öhdəliyi var. Zatən 5 ildir quru sərhədləri bağlı saxlayıblar, zatən bir neçə dövlət-hökumət qurumuna Ana Yasada təsbit olunan hüququn məhdudlaşdırma səlahiyyəti tanıyıblar. İndi də belə bir “stop” düyməsini Gömrük Komitəsinə verirlər – olmaz belə, Vallah olmaz!”

Günay ATİLLA