Partlayış törədən onkoloji xəstə QAZİDİR? - AÇIQLAMA + FOTO
"Milli Onkologiya Mərkəzində onkoloji xəstə kimi qeydiyyatda olan, dünən özünü və həkimi partladan 1988-ci il təvəllüdlü Mübariz Sahib oğlu Əliyevi ictimaiyyətə muharibə qazısi kimi təqdim olunduğunu gördüm. Kiçik bir araşdırma apardım. Məlum oldu ki, işğaldan azad edilən rayonlardan birində anadan olan Mübariz Əliyev 2006-2007-ci illərdə müddətli hərbi xidmətdə olub. Səfərbərlik zamanı isə orduya çağırılmayıb. Mübariz nə müharibə iştirakçısıdır, nə də müharibə əlili".
Xpress.az xəbər verir ki, bu barədə hərbi ekspert Ədalət Verdiyev məlumat yayıb.
O qeyd edib ki, son illərdə xaricdə oturan bəzi üzdən iraq "media mənsubları" harada neqativ hadisə baş verirsə, dərhal müharibə iştirakçılarının bu proseslərdə adını hallandirmaqla ictimaiyyət arasında gərginlik yaratmağa və bununla da səhifələrində geniş izləyici kütləsi toplamağa çalışırlar: "Üzdə müharibə iştirakçılarını guya müdafiə etdiklərini göstərməyə, əslində isə alt şüurda müharibə iştirakçılarını ictimaiyyətə "bandit", quldur və terrorçu imicində təqdim etməyə çalışırlar. Dəyərli izləyicilər, hər oxuduğumuz və eşitdiyimiz xəbər doğru olmaya bilər. Etibarlı mənbələri izləyin. Əlbəttə ki, bu xoşagəlməz bir hadisədir. Ümid edirəm ki, hüquq-mühafizə orqanları ətraflı araşdırma aparacaq, hadisənin səbəb və nəticələri barədə ictimaiyyətə geniş məlumat verəcəklər".
Fotoda həkim-radioloq Asif Nəsirlidir
Xatırladaq ki, aprelin 30-da saat 14:00 radələrində Azərbaycan Respublikası Səhiyyə Nazirliyinin "Milli Onkologiya Mərkəzi"ndə partlayış törədilib. Baş Prokurorluğun bununla bağlı yaydığı məlumata görə, onkoloji xəstə kimi qeydiyyatda olan 1988-ci il təvəllüdlü Əliyev Mübariz Sahib oğlu qanunsuz olaraq əldə edib saxladığı, üzərində gəzdirdiyi partlayıcı vasitəni qeyd olunan müalicə müəssisəsinin Radiologiya şöbəsində partladıb. Partlayış nəticəsində Mübariz Əliyev aldığı xəsarətlərdən hadisə yerində ölüb. Tibb müəssisəsinin həkim-radioloqu Nəsirov Asif Akif oğlu isə ağır bədən xəsarətləri alıb. Hazırda onun müalicəsi xəstəxanada davam etdirilir.
Günay ATİLLA
