Körpə iki dəfə dünyaya gəldi
ABŞ-ın Florida ştatında qeyri-adi tibbi hadisə baş verib. “The Guardian” qəzetinin məlumatına görə, nadir inkişaf pozğunluğu səbəbindən bir oğlan uşağı unikal tibbi prosedur nəticəsində sanki iki dəfə dünyaya gəlib.
Hamiləliyin 19-cu həftəsində aparılan ultrasəs müayinəsi zamanı həkimlər döldə yüksək hava yolu obstruksiyası sindromu (XAOS) aşkarlayıblar. Bu, dölün hava yollarını tamamilə bağlayan anormal membranın yaranması ilə xarakterizə olunan çox nadir anadangəlmə vəziyyətdir. Nəticədə ağciyərlərdə maye toplanır və bu hal, adətən, körpənin ya bətn daxilində, ya da doğuşdan dərhal sonra ölümünə səbəb olur.
Proseduru həyata keçirən təcrübəli cərrah Dr. Emanuel Vlastos bildirib ki, o, 42 illik karyerası ərzində cəmi bir neçə belə hal ilə qarşılaşıb.
İlk mərhələdə həkimlər standart üsula müraciət edərək uşaqlıqdaxili lazer əməliyyatı ilə membranı kəsməyə çalışıblar. Lakin bu cəhd uğursuz olub. Bundan sonra Dr. Vlastos daha riskli və nadir tətbiq olunan müalicə planı təklif edib.
Hamiləliyin 25-ci həftəsində həyata keçirilən əməliyyat zamanı qismən qeysəriyyə kəsiyi aparılıb. Dölün yuxarı hissəsi – başı və qolları – ananın uşaqlığından çıxarılıb, lakin aşağı hissəsi, göbək bağı və plasenta ilə birlikdə ana orqanizminə bağlı saxlanılıb.
Bu kritik mərhələdə hər saniyə böyük əhəmiyyət daşıyırdı. Körpə bu vəziyyətdə olarkən KBB cərrahı onun hava yollarında əməliyyat apararaq tıxanmanı aradan qaldırıb və bronxları təmizləyib.
Əməliyyatdan sonra döl yenidən uşaqlığa yerləşdirilib və cərrahi kəsik bağlanıb. Ana isə xəstəxanada saxlanılaraq “dölün tamamlanması” mərhələsində həkimlərin nəzarəti altında olub ki, körpənin vəziyyəti diqqətlə izlənilsin.
Xpress.az
