İlon Mask: “Kosmosda yadplanetlilərlə qarşılaşa bilərik”

Elon Musk kosmosun araşdırılması zamanı yadplanetlilərlə qarşılaşma ehtimalını istisna etmədiyini bildirib.
Amerikalı sahibkar və milyarder İlon Mask çıxışında qeyd edib ki, bəşəriyyət müxtəlif ulduz sistemlərini araşdırdıqca yadplanetli və ya yerüstü olmayan sivilizasiyalarla qarşılaşa bilər. Onun çıxışının səs yazısı sosial şəbəkə hesabında paylaşılıb.
Xpress.az xəbər verir ki, Mask bildirib ki, Ay missiyalarından sonra daha iddialı mərhələlər gələcək: əvvəlcə Mars, daha sonra Günəş Sistemi və nəhayət digər ulduz sistemlərinə səyahətlər mümkün ola bilər.
“Bəlkə də yadplanetlilərlə qarşılaşacağıq. Ola bilsin ki, milyonlarla ildir mövcud olan sivilizasiyaları görəcəyik və onların izlərini tapacağıq”, – deyə o qeyd edib.
Onun sözlərinə görə, bu məqsədlərə çatmaq üçün Ayda yaşayış məntəqələrinin qurulması, həmçinin kosmik tədqiqatlar üçün süni intellektlə təchiz olunmuş peykləri buraxacaq xüsusi platformaların yaradılması vacibdir.
İlon Mask daha əvvəl də kosmik layihələrə ilhamın Star Trek serialından gəldiyini və gələcəkdə kosmik səyahətləri, eləcə də yadplanetlilərlə mümkün görüşləri reallığa çevirmək istədiyini vurğulamışdı.