Yaşlılar üçün günün ən riskli saatı BƏLLİ OLDU
Gerontoloq və kardioloqların araşdırmalarına görə, xüsusilə 70 yaşdan yuxarı insanlar üçün gecə saat 03:00–04:00 aralığı sağlamlıq baxımından ən həssas dövr hesab olunur.
Xpress.az xəbər verir ki, mütəxəssislər bildirirlər ki, bu saatlarda ürək-damar sistemi daha zəif fəaliyyət göstərə bilər və infarkt, insult, eləcə də yuxuda qəfil ölüm halları daha çox müşahidə olunur.
Mütəxəssislərin fikrincə, bunun əsas səbəblərindən biri gecə saatlarında qan təzyiqi və ürək ritminin aşağı düşməsidir. Yaş artdıqca damarların elastikliyi azalır, ürəyin fəaliyyəti zəifləyir və bu dəyişikliklər bəzi insanlarda ciddi risk yarada bilər.
Bundan əlavə, gecə saatlarında parasimpatik sinir sisteminin aktivliyi artır. Bu isə ürək döyüntüsünün yavaşlamasına səbəb olur. Ürək ritmində problemi olan yaşlı insanlarda bu vəziyyət təhlükəli nəticələrə gətirib çıxara bilər.
Həkimlər həmçinin yuxu apnesinin — yəni yuxu zamanı nəfəsin qısa müddətə dayanmasının — yaşlı insanlarda geniş yayıldığını bildirirlər. Xüsusilə gecənin bu saatlarında nəfəs fasilələrinin daha uzun çəkməsi oksigen çatışmazlığı riskini artırır.
Mütəxəssislər yaşlı insanlara aşağıdakı tövsiyələri verirlər:
Yatmazdan əvvəl kifayət qədər su qəbul etmək;
Baş nahiyəsini bir qədər hündür vəziyyətdə saxlamaq;
Müntəzəm olaraq qan təzyiqi və ürək ritmini yoxlatdırmaq;
Zəruri hallarda Holter monitorinqi və yuxu müayinəsindən keçmək;
Gecə nəfəs darlığı, ürəkdöyünmə və ya tez-tez oyanma halları olduqda həkimə müraciət etmək.
Bununla belə, məqalədə qeyd olunan bəzi statistik göstəricilər və “03:33-dən sonra oyanmırlar” kimi ifadələr elmi cəhətdən təsdiqlənmiş məlumat kimi qəbul olunmamalıdır. Həkimlər panikaya düşmək əvəzinə, mütəmadi tibbi nəzarətin və sağlam həyat tərzinin daha vacib olduğunu vurğulayırlar.
