Birinci Türkoloji Qurultayın 100 illiyinə LAYİQLİ TÖHFƏ - FOTO
Azərbaycan Dövlət Pedaqoji Universitetinin (ADPU) professoru, pedaqoji elmlər doktoru, Əməkdar elm xadimi Fərrux Rüstəmovun yeni kitabı işıq üzü görüb.
Xpress.az xəbər verir ki, “Azərbaycan Dövlət Pedaqoji Universiteti və Birinci Ümumittifaq Türkoloji Qurultay” adlanan 454 səhifəlik yeni nəşr iki illik zəhmətin bəhrəsidir.
Kitabın müəllifi F.Rüstəmov Birinci Türkoloji Qurultayın tarixi, keçirilmə zərurəti, türk dünyasının elmi-mədəni inteqrasiyasında, xüsusilə Azərbaycan dilinin inkişafında oynadığı mühüm rol və digər məsələləri ətraflı araşdırıb.
Kitabın ideya müəllifi ADPU-nun rektoru,tarix elmləri doktoru, professor Cəfər Cəfərov, elmi redaktoru ADPU-nun beynəlxalq əlaqələr üzrə prorektoru, filologiya elmləri doktoru, professor, Əməkdar müəllim Mahirə Hüseynova, elmi məsləhətçisi Azərbaycan Atatürk Mərkəzinin direktoru, AMEA-nın həqiqi üzvü Nizami Cəfərov, ön sözün müəllifi AMEA Dilçilik İnstitutunun baş direktoru, filologiya elmləri doktoru, professor Nadir Məmmədlidir.
Xatırladaq ki, 2026-cı ilin fevral ayında Bakı şəhərində Birinci Türkoloji Qurultayın təşkilinin 100 ili tamam olub. Bir əsr bundan öncə keçirilən Qurultay Azərbaycanın və bütövlükdə türk dünyasının XX əsr elmi-mədəni həyatının parlaq səhifəsini təşkil edir. Prezident İlham Əliyev Birinci Türkoloji Qurultayın 100 illik yubileyinin keçirilməsinin təmin olunması məqsədilə 22 oktyabr 2025-ci il tarixdə Sərəncam imzalayıb.
Həmin sərəncamdan irəli gələrək, 2026-cı il ərzində Mədəniyyət Nazirliyi Azərbaycan Milli Elmlər Akademiyası və Elm və Təhsil Nazirliyi ilə birlikdə Birinci Türkoloji Qurultayın 100 illik yubileyinə dair tədbirlər planı hazırlayıb həyata keçirir. Professor F.Rüstəmovun yeni kitabı da bu çərçivədə həyata keçirilən tədbirlərdən biri, Qurultayın yüz illiyinə layiqli töhfədir.
Günay ATİLLA
