Bu ölkədə sosial mediaya yaş məhdudiyyəti qoyuldu
Malayziya hökuməti 16 yaşdan aşağı şəxslərin sosial şəbəkələrdən istifadəsini məhdudlaşdıran yeni qaydaların 1 iyun tarixindən etibarən qüvvəyə minəcəyini açıqlayıb.
Bu barədə “Engadget” platforması məlumat yayıb. Yeni tələblərə əsasən, ölkədə 16 yaşdan kiçik istifadəçilərin sosial media hesabı açmasına icazə verilməyəcək.
Qaydalara əsasən, Meta platformalarına məxsus Facebook və Instagram, eləcə də TikTok və YouTube kimi xidmətlər yaş təsdiqləmə sistemləri tətbiq etməli olacaqlar. Yeni istifadəçilər qeydiyyat zamanı yaşlarını təsdiqləməli, mövcud istifadəçilər isə sonradan verifikasiya prosesindən keçməli olacaqlar. Malayziya hökuməti bildirib ki, bu addım uşaqların zərərli məzmun, təhlükəli ünsiyyət formaları və yaşlarına uyğun olmayan platforma funksiyalarından qorunması məqsədi daşıyır.
Yeni sistem “nəticə əsaslı” yanaşma ilə işləyəcək. Bu isə o deməkdir ki, platformalar yaş yoxlaması üçün istifadə ediləcək texnologiyanı özləri seçə bilərlər. Verifikasiya prosesində Malayziya və ya digər ölkələrin rəsmi dövlət sənədlərinə əsaslanan identifikasiya üsullarından istifadə edilməlidir. Qaydalara əsasən, yaş təsdiqindən keçməyən yeni istifadəçilərin hesab yaratması bloklanacaq, mövcud istifadəçilərin isə platformalara çıxışı məhdudlaşdırılacaq.
