Məzahir Əfəndiyev: “Ulu Öndərin qayıdışı Azərbaycanı böhrandan xilasa çıxardı”
Hər bir xalqın milli azadlıq və istiqlaliyyət tarixində xilaskar rolunu oynayan dahi şəxsiyyətlər var. Bu dahilər qətiyyətləri ilə xalqı arxasınca apararaq taleyüklü məqamlarda həlledici rol oynamışlar. Müdrik xalqımızın Ümummilli Lideri Heydər Əliyev müxtəlif dövrlərdə, ağır siyasi şəraitdə Azərbaycana rəhbərlik edərək xilaskarlıq missiyasını yerinə yetirmiş və müasir müstəqil dövlətimizin təməlini qoymuşdur.
15 iyun – demokratik Azərbaycan Respublikasının qorunması və hüquqi dövlət quruculuğunun başlanğıc tarixidir. Bu gün Ulu Öndər Heydər Əliyevin xalqın təkidli tələbi ilə Naxçıvandan Bakıya gələrək ölkəyə xidmətə başladığı gündür.
Milli Qurtuluş Günü kimi tarixə düşən bu tarix xalqımızın milli yaddaşında xüsusi yer tutur. Bu gün Azərbaycanın tənəzzüldən xilas olaraq sabitlik və inkişaf yoluna çıxması, müstəqil siyasət həyata keçirən dövlət kimi formalaşması ilə səciyyələnir.
1993-cü il 15 iyunda Heydər Əliyevin hakimiyyətə qayıdışı ölkəni böhrandan xilas etmiş, 24 iyunda isə ona Prezident səlahiyyətləri verilmişdir. Ulu Öndər ilk növbədə ölkədə sabitlik və vətəndaş həmrəyliyini təmin edərək anarxiyaya son qoymuşdur.
Bunun nəticəsində Azərbaycan vətəndaş müharibəsi təhlükəsindən xilas olmuş, dövlət müstəqilliyi möhkəmlənmişdir. Həmin dövrdən etibarən ölkədə islahatlar başlanmış, sabitlik və inkişaf təmin edilmişdir.
Bu tarix 1997-ci ildə Milli Məclis tərəfindən dövlət bayramı kimi təsbit olunmuşdur. Prezident İlham Əliyev bu günü “Azərbaycan tarixində dönüş nöqtəsi” kimi qiymətləndirmişdir.
1993–2003-cü illər Azərbaycanın dirçəliş dövrü kimi tarixə düşmüş, 2003-cü ildən sonra isə bu siyasət uğurla davam etdirilmişdir. Prezident İlham Əliyevin rəhbərliyi ilə Azərbaycan regionda və dünyada güclü, müstəqil mövqeyə malik dövlətə çevrilmişdir.
2020-ci ildə Vətən müharibəsində qazanılan Zəfər, 2023-cü ildə suverenliyin tam bərpası Heydər Əliyev siyasətinin məntiqi nəticəsidir. Bu gün azad edilmiş ərazilərdə aparılan bərpa-quruculuq işləri Böyük Qayıdışın reallaşmasına xidmət edir.
Heydər Əliyev Azərbaycan dövlətçiliyinin rəmzi kimi qəbul edilir və onun xatirəsi xalq tərəfindən daim ehtiramla anılır. Beləliklə, əldə olunan nailiyyətlər Azərbaycanın müstəqilliyinin daha da möhkəmlənəcəyinə və əbədi olacağına inam yaradır.
Məzahir Əfəndiyev
Azərbaycan Respublikası
Milli Məclisinin deputatı
