Əhalinin DİQQƏTİNƏ! Ət ucuzlaşa bilər - SƏBƏB
Bu ilin yanvar-aprel aylarında Azərbaycan 17,4 milyon ABŞ dolları dəyərində 4 min 412 ton iribuynuzlu heyvan əti (təzə və yaxud soyudulmuş, dondurulmuş) idxal edib. Dövlət Statistika Komitəsinin məlumatına görə, bu, ötən ilin göstəricisindən dəyər ifadəsində 40 %, kəmiyyət olaraq 39 % çoxdur.
Hesabat dövründə Azərbaycan Ukraynadan 10,8 milyon ABŞ dolları dəyərində (1 il əvvəlki göstəricidən 74 % çox) 2 min 158 ton (+45 %), Braziliyadan 3,5 milyon ABŞ dolları dəyərində (+33 %) 1 min 491 ton (+78 %), Belarusdan 1,6 milyon ABŞ dolları dəyərində (-13 %) 340 ton (-18 %), Hindistandan 1,1 milyon ABŞ dolları dəyərində (-11 %) 319 ton (-21 %), Rusiyadan 231 min ABŞ dolları dəyərində (+88 %) 72 ton (+5 dəfə) məhsul alıb.
Cebhe.info qeyd edir ki, marketlərin əksəriyyətində istehlakçılara xaricdən idxal olunan ətlər satılır. Ət idxalı artsa da, qiyməti heç də ucuz deyil.
İqtisadçı Eyyub Kərimli Musavat.com-a bildirib ki, bu gün ölkəmizə idxal olunan mal ətinin qiyməti təxminən 6-8 manat arasında formalaşır: “Bunun üzərində logistika, ədv, gömrük rüsumu, saxlama xərcləri əlavə olunur, bu da 50 faizə qədər artım deməkdir. Düşünürəm ki, buna görə maya dəyəri 12-13 manat formalaşır. Bu səbəbdən marketlərdə idxal olunan mal ətinin qiymətinin 17-20 manat arasında dəyişdiyini müşahidə edirik. Qiymətin yüksək olması həm də tələbatla bağlıdır. Vəziyyəti tənzimləmək üçün idxalı şaxələndirməliyik. Dövlət ciddi, şəffaf rəqabət mühitinin formalaşmasına nəzarət etməlidir. Digər tərəfdən bazarda daha çox payı olan pərakəndə ticarətçilərin sövdələşməsinin qarşısı alınmalıdır”.
Eyyub Kərimli: “COP29 ölkəmizə yatırılan investisiyaların həcminə əhəmiyyətli təsir edəcək”
Onun fikrincə, bəzi hallarda pərakəndə ticarət obyektləri yüksək tələbatı nəzərə alaraq süni qiymət artımına, daha çox gəlir əldə etməyə çalışırlar: “Bu da bahalığın səbəblərindən biridir. İdxalçıların arasında razılaşma da mümkündür. Sözsüz ki, ətin qiymətinin ucuzlaşması üçün yerli istehsalı daha çox artırmalıyıq və xarici bazarlardan asılılığı azaltmağa çalışmalıyıq”.
