Azərbaycanda cinayətkar qrupun YENİ DƏLƏDUZLUĞU - FOTO
“Hazırda bir qrup dələduz meydana gəlib. Bu cinayətkar qrup şəhərdə ayrı-ayrı vətəndaşlara məxsus avtomobillərin şəklini çəkib internetdə yerləşdirir və dəyərindən olduqca ucuz satdıqlarını qeyd edirlər”.
Xpress.az xəbər verir ki, bu barədə tanınmış hüquqşünas, sabiq müstəntiq Müşfiq Abbasov sosial media hesabında paylaşım edib.
O qeyd edib ki, avtomobil almaq istəyən şəxs bu məlumatı görür və dərhal elanda olan mobil nömrəyə zəng edir: “Müştəri ilə telefonda danışan şəxs rayonda yaşadığını, yaxın adamının xəstə olduğunu və təcili pul lazım olduğu üçün avtomobili ucuz qiymətə satdığını bildirir. Bir az da qəmgin və saf insan təəssüratı yaradan həmin şəxs başqa müştərilərin də az əvvəl zəng etdiyini bildirib kim tez qabağa düşərsə, avtomobili ona satacağını bildirir. Müştəri tez əl-ayağa düşür ki, avtomobili satma, özüm alıram. Qarşı tərəf deyir ki, başqaları da belə deyir, əgər fikrin ciddidirsə beh at, o kart nömrəsi verir və müştəri həmin karta 300 manat atır. Sonra avtomobilin olduğu rayona yollanır və oraya çatanda bayaq danışdığı nömrəyə artıq zəng çatmır. Məlum olur ki, həmin rayonda belə bir avtomobil heç yoxdur. Bu yolla hazırda ölkəmizdə yüzlərlə adam aldadılıb”.
Hüquqşünas bildirib ki, polisin bu dələduzları məsuliyyətə cəlb etməsi çətinləşib: “Bu cinayətkar şəbəkə xaricdən idarə olunduğuna görə və aldadılıb alınan məbləğ 500 manatdan az olduğu üçün polisin onları məsuliyyətə cəlb etməsi də çətindir. Odur ki, insanlar bu məsələdə son dərəcədə diqqətli olmalıdır”.
Ərturan İSMAYIL
