Sumqayıt Tibb Mərkəzində hemofiliya ilə bağlı elmi-praktik seminar keçirilib

Qeyri-Hökumət Təşkilatlarına Dövlət Dəstəyi Agentliyi və TƏBİB-in dəstəyi, Hemofiliya və digər Hemostaz Pozuntuları Assosiasiyasının təşkilatçılığı ilə Sumqayıt Tibb Mərkəzində elmi-praktik seminar keçirilib.
“Hemofiliya xəstəliyinin müalicəsində beynəlxalq standartlara əsaslanan tibb bacısı işinin təşkili” mövzusuna həsr olunan seminarın məqsədi hemofiliyanın müalicəsində həkim və tibb bacılarının bilik və bacarıqlarının artırılması, müasir yanaşmaların tətbiqinin təşviq edilməsi olub.
Tədbirdə giriş nitqi ilə çıxış edən Sumqayıt Tibb Mərkəzinin direktor müavini, İlkin səhiyyə xidmətinin rəhbəri Namiqə Abbasova mövzunun aktuallığını vurğulayıb və seminarın işinə uğurlar arzulayıb.
Daha sonra Hemofiliya və digər Hemostaz Pozuntuları Assosiasiyasının sədri Ayaz Hüseynov “Beynəlxalq təcrübəyə əsaslanan evdə müalicənin tətbiqi və faydası”, Respublika Klinik Xəstəxanasının həkim-hematoloqu Ələmdar Cəfərzadə “Hemofiliyanın multidisiplinar müalicə modeli”, Sumqayıt Hospitalının baş tibb bacısı Mirvarid Siracova “Hemofiliyanın müalicəsində tibb bacısının rolu”, MediClub Təcili Təxirəsalınmaz Tibbi Yardımın həkim-terapevti Mətin Mahmudov isə “Xarici və daxili qanaxmalar zamanı təcili tibbi yardım” mövzularında çıxış ediblər.
Seminarın sonunda qanaxmalar zamanı ilkin müdaxilə ilə bağlı praktiki nümayişlər keçirilib, iştirakçıları maraqlandıran suallar cavablandırılıb.
Layihənin əsas məqsədi hemofiliyanın ev şəraitində müalicə və profilaktika modelini təşviq etmək, pasiyentlərin həyat keyfiyyətini yüksəltmək, uşaqların fiziki məhdudiyyət və əlillik yaranmadan sağlam böyüməsinə töhfə verməkdir.