İstehlakçı hüquqları və bazara nəzarət mövzusunda təlim keçirilib
Azərbaycan Respublikasının Prezidenti yanında Antiinhisar və İstehlak Bazarına Nəzarət Dövlət Agentliyinin təşkilatçılığı ilə Lənkəranda istehlak bazarına nəzarət mexanizmləri və istehlakçı hüquqlarının müdafiəsi mövzusunda maarifləndirici təlim təşkil olunub.
Xpress.az xəbər verir ki, nümayəndəsi Agentliyin İstehlak bazarına nəzarət şöbəsinin müdiri Yusif Tapdıqlı təlim zamanı slaydlar və qanunvericilik tələbləri əsasında iştirakçılara aşağıdakı əsas istiqamətlər üzrə ətraflı məlumat verib:
- İstehlakçıların əsas hüquqları və malların dəyişdirilməsi qaydası: Alıcıların malların keyfiyyəti və təhlükəsizliyi, məhsullar haqqında dolğun və düzgün məlumat əldə etmək hüquqları izah olunub. Bildirilib ki, istehlakçılar aldıqları lazımi keyfiyyətli qeyri-qida mallarını (ölçüsünə, rənginə, formasına və s. görə uyğun gəlmədikdə) əmtəə görünüşü və kassa qəbzi qorunmaqla qanunvericiliklə nəzərdə tutulmuş müddətdə (alınma günü sayılmamaq şərti ilə 14 gün – 15-ci günə qədər) digər uyğun mala dəyişdirə bilərlər. Həmçinin qüsurlu mal satıldığı halda alıcının malın dəyişdirilməsini, qüsurun əvəzsiz aradan qaldırılmasını, qiymətin azaldılmasını və ya ödənilmiş məbləğin geri qaytarılmasını tələb etmək hüququ olduğu vurğulanıb.
- Zərərin ödənilməsi və məhkəməyə müraciət hüququ: Keyfiyyətsiz və ya təhlükəli mal, iş və xidmətlər nəticəsində həyatına, sağlamlığına və ya əmlakına zərər dəymiş alıcıların dəymiş maddi və mənəvi zərərin tam həcmdə ödənilməsini tələb etmək, eləcə də pozulmuş hüquqlarının bərpası üçün birbaşa məhkəməyə və səlahiyyətli dövlət orqanlarına müraciət etmək hüquqları barədə ətraflı məlumat verilib.
- İstehlak bazarına nəzarət sahələri: Dövlət əyar nəzarəti (qiymətli metallardan və daşlardan hazırlanmış məmulatların damğalanması), birdəfəlik plastik məmulatların (15 mikrona qədər polietilen torbalar, plastik çəngəl, qaşıq, stəkan və s.) istehsalı və satışına nəzarət, dərman vasitələrinin satışında qiymət intizamı, eləcə də qeyri-qida mallarının texniki reqlamentlərin tələblərinə (təhlükəsizlik, markalanma, Azərbaycan dilində məlumatlandırma) uyğunluğu barədə izahatlar verilib.
- Digər xüsusi nəzarət istiqamətləri: İşıqlandırma məqsədli elektrik közərmə lampalarının (0,06 kVt və yuxarı gücə malik lampalar üçün 2026-cı il yanvarın 1-dən, 0,025–0,06 kVt gücündə olanlar üçün isə 2026-cı il iyulun 1-dən) idxalı, istehsalı və satışına tətbiq olunan qadağaya nəzarət, alkoqollu içkilərin (araq məhsullarının) müəyyən edilmiş minimum satış qiymətindən aşağı satılmaması, həmçinin elektron siqaretlərin və onların komponentlərinin topdan və ya pərakəndə satışına, eləcə də satış məqsədilə saxlanılmasına nəzarət qaydaları diqqətə çatdırılıb.
- Dəyişdirilməli olmayan malların siyahısı: Azərbaycan Respublikası ərazisində pərakəndə ticarət obyektlərində geri qaytarılması və ya dəyişdirilməsi nəzərdə tutulmayan məhsullar (qızıl və qiymətli daşlardan məmulatlar, parfümer-kosmetika, şəxsi gigiyena əşyaları, məişət-kimyası malları, uşaq oyuncaqları, çimərlik və alt paltarları, eləcə də dəyəri ödənilmiş və mağazadan çıxarılmış yararlılıq müddəti ərzində olan qida məhsulları) izah edilib.
Həmçiinin istehlakçı hüquqlarının müdafiəsi sahəsində dövlət siyasətini həyata keçirən əsas orqan kimi Antiinhisar və İstehlak Bazarına Nəzarət Dövlət Agentliyinin rolu, sahəvi tənzimləyici qurumlar (Mərkəzi Bank, Qida Təhlükəsizliyi Agentliyi, Rəqəmsal İnkişaf və Nəqliyyat Nazirliyi) və məhkəmələrin fəaliyyət mexanizmləri barədə danışılıb.
Təlimin sonunda iştirakçıları maraqlandıran suallar cavablandırılıb və praktiki nümunələr üzərindən müzakirələr aparılıb.

Məhluqə Nuralıyeva