"Jurnalistika da özünəməxsus peşə mədəniyyətinə malikdir"- Nazife Güngör
"Jurnalistin əsas vəzifəsi cəmiyyətə düzgün və dəqiq məlumat ötürməkdir. Cəmiyyətdə həyəcan yaratmaq üçün duyğulara oynamaq əvəzinə, cəmiyyətin inkişafına töhfə vermək məqsədilə bilgi paylaşmaq jurnalistin prioriteti olmalıdır".
Bu fikirləri Türkiyənin Üsküdar Universitetinin rektoru Nazife Güngör Xpress.az saytına verdiyi açıqlamada bildirib.
"Eyni zamanda, müəyyən güc mərkəzlərinə yaraşmaq üçün ideoloji mesajlar vermək yerinə, jurnalist tərəfsiz mövqe tutaraq məlumatları obyektiv şəkildə təqdim etməli, sağlam düşüncənin və ictimai həssaslığın formalaşmasına xidmət etməlidir. Bu isə əlbəttə ki, zəhmət və ciddi iş tələb edir. Araşdırmaq, oxumaq, yazmaq və səy göstərmək vacibdir. Ancaq hadisələrə hazır qəliblərlə və əvvəlcədən formalaşmış qənaətlərlə yanaşmaq jurnalistikanın mahiyyətinə ziddir və belə halda fəaliyyət jurnalistika sayılmaz.
Digər tərəfdən, hər peşənin özünəməxsus mədəniyyəti mövcuddur və bu mədəniyyətin inkişafı üçün əlverişli ümumi ictimai mühit önəmlidir. Jurnalistika da özünəməxsus peşə mədəniyyətinə malikdir. Bu mədəniyyətin formalaşması və peşənin keyfiyyətlə icra olunması üçün uyğun struktur və funksional şəraitin yaradılması vacibdir. Bu isə yalnız ümumi sistem daxilində mümkün ola bilər".
