Luvrda tarixi oğurluq: Parisin mərkəzində 7 dəqiqəlik cinayət əməliyyatı
Fransanın paytaxtı Parisdə yerləşən dünyaca məşhur Luvr muzeyində baş vermiş böyük zərgərlik oğurluğu ölkədə ciddi ictimai rezonans yaradıb. Hadisə barədə danışan Fransa ədliyyə naziri Jerald Darmanən bildirib ki, təhlükəsizlik tədbirlərinin uğursuzluğu nəticəsində bu hadisə “Fransa üçün çox mənfi təsir” yaradıb.
Yeddi dəqiqəlik planlı əməliyyat
Məlumata görə, dörd maskalı şəxs bazar günü səhər saat 09:30 radələrində Luvr muzeyinin Apolon Qalereyasına daxil olub. Onlar mexaniki liftlə muzeyin balkonuna qalxaraq şüşə pəncərələri kəsiblər və içəri giriblər. Təhlükəsizlik əməkdaşlarını hədələyən cinayətkarlar şüşə vitrini qıraraq minlərlə brilyant və qiymətli daşlardan ibarət səkkiz zərgərlik məmulatını oğurlayıblar. Oğurluq cəmi 7 dəqiqə davam edib.
Napoleonun imperatriçəsinə hədiyyə etdiyi boyunbağı da oğurlanıb
Oğurlanan eksponatlar arasında imperator Napoleonun həyat yoldaşı Mari-Luizaya bağışladığı brilyant və zümrüddən ibarət boyunbağı, həmçinin imperatriça Yujeniya və kraliça Mari-Ameliyə məxsus olmuş dəyərlər də var. Hər biri ölçüyəgəlməz tarixi və maddi dəyərə malik bu əşyaların bir çoxunun təxminən 2 min brilyant daşla bəzədildiyi bildirilir.
Nazir: “Fransa üçün çox pis təsir bağışladı”
Hadisəyə reaksiya verən ədliyyə naziri Jerald Darmanən deyib:
“İnsanlar Parisin mərkəzində mebel qaldıran kranı yerləşdirib bir neçə dəqiqəyə qiymətsiz zinət əşyalarını oğurlayıb. Bu, Fransa üçün çox pis təsir bağışladı.”
Daxili işlər naziri Loran Nünes isə Fransada muzeylərin təhlükəsizlik sistemlərində “böyük zəifliklər” olduğunu etiraf edib. Fransız mediasının məlumatına görə, oğurluğun baş verdiyi muzey qanadında olan otaqların üçdə birində müşahidə kameraları işlək vəziyyətdə deyilmiş.
“Əgər 48 saata tapılmasalar, zinət əşyaları itib gedəcək”
Art Recovery International təşkilatının rəhbəri Kris Marinello isə BBC-yə açıqlamasında bildirib ki, əgər oğrular növbəti 24–48 saat ərzində yaxalanmasa, oğurlanmış zərgərlik məmulatları tamamilə yox ola bilər:
“Bu cür cinayətkarlar zinət əşyalarını bütöv saxlamayacaq. Onlar daşları çıxarıb, metallarını əridəcək və sübutları gizlədəcəklər.”
Muzey bağlandı, istintaq davam edir
Luvr muzeyi hadisədən sonra bazar ertəsi günü bağlandığını açıqlayıb. Prezident Emmanuel Makron oğurluğu “Fransa tarixinin və mədəni irsinin ürəyinə vurulmuş zərbə” adlandırıb.
Fransa Senatının Maliyyə Komitəsinin üzvü Nathalie Qule isə bildirib ki, bu hadisə “çox ağrılı və utandırıcı”dır:
“Bu, sıradan bir hadisə deyil. Təşkilatlı cinayətdir və oğruların məqsədi tarixi dəyər deyil, pul yuyulmasıdır.”
Hazırda polis və mədəniyyət nazirliyi hadisə ilə bağlı birgə istintaq aparır və oğruların tezliklə ələ keçiriləcəyi bildirilir.
