Nağıllar səhnəyə qayıdır: Balet bayramı başlayır
Son aylarda maraqlı layihələrlə ölkənin sənət gündəmində seçilən Azərbaycan Dövlət Akademik Opera və Balet Teatrı növbəti yeniliyi ilə sənətsevərlərin görüşünə gəlir. Teatrın təşəbbüsü ilə ölkəmizdə ilk dəfə olaraq Balet Günləri keçiriləcək.
Yeni layihə təsadüfən “Hərəkətlə yazılan hekayə” adlandırılmayıb. Balet sənətinin mahiyyətini əks etdirən bu bayram günlərində üç möhtəşəm tamaşa nümayiş etdiriləcək.
Oktyabrın 15-də, kollektiv görkəmli bəstəkar Fikrət Əmirovun şah əsəri olan “Min bir gecə” baletini təqdim edəcək. Ərəb xalq nağıllarının motivləri əsasında yazılmış bu əsərin librettosu baletin ilk quruluşçusu, tanınmış baletmeyster Nailə Nəzirovaya və Xalq yazıçıları Maqsud və Rüstəm İbrahimbəyov qardaşlarına məxsusdur.
Tamaşada əsas partiyaları Əməkdar artistlər Nigar İbrahimova (Şəhrizad) və Anar Mikayılov (Şəhriyar), beynəlxalq müsabiqələr laureatları Ayan Eyvazova (Nuridə) və Seymur Qədiyev (Nuridənin sevimli qulu) ifa edəcəklər. Baletdəki solo vokal partiya isə Xalq artisti Gülnaz İsmayılovanın ifasında səslənəcək. Tamaşanı Əməkdar artist, teatrın baş dirijoru Əyyub Quliyev idarə edəcək.
Balet Günləri oktyabrın 28-də bəstəkar Polad Bülbüloğlunun “Eşq və ölüm” baleti ilə davam edəcək. “Kitabi-Dədə Qorqud” eposunun motivləri əsasında yazılmış bu iki pərdəli səhnə əsərinin librettosu və quruluşçu xoreoqrafiyası Rusiyanın Əməkdar İncəsənət xadimi Nadejda Maliginaya aiddir.
Nəhayət, Balet Günlərinin son tamaşası noyabrın 11-də nümayiş olunacaq. Həmin gün akademik teatrın balet truppası dahi bəstəkar Qara Qarayevin “Yeddi gözəl” baleti ilə ciddi musiqi və incəsənət sevərlərin görüşünə gələcək.
Balet Günləri çərçivəsində bu ali və incə rəqs sənətinə həsr olunmuş müxtəlif tədbirlər və ustad dərslərinin keçirilməsi də nəzərdə tutulub.
Bütün tamaşalar Heydər Əliyev adına Sarayın səhnəsində təqdim olunacaq.
Gülcahan
