Mərkəzi istilik sistemi istifadə etməyən yaponlar evlərini bu cür qızdırırlar
Yaponlar, Qərb ölkələrinə nisbətən daha fərqli isınma üsulları istifadə edirlər. Evlerinde mərkəzi istilik sistemi olmayan yaponların üsulu olduqca sadədir. Həm iqtisadi, həm də təbiidir…
Dünyanın bir çox ölkəsində qış ayları mərkəzi istilik sistemləri ilə keçirilərkən, Yaponiyada vəziyyət xeyli fərqlidir. Ölkədə geniş şəkildə istifadə olunan mərkəzi istilik infrastrukturu olmamasına baxmayaraq, yaponlar qış aylarında evlərində üşümədən yaşamağı bacarırlar.
Yaponiyada evin qızdırılması anlayışı digər Qərb ölkələrindən tamamilə fərqli bir məntiqə əsaslanır. Yapon mədəniyyətində “bütün evi qızdırmaq” əvəzinə “insanı qızdırmaq” üstünlük təşkil edir. Bu səbəbdən enerjini geniş sahələrə yayan sistemlər yerinə, birbaşa bədəni qızdıran praktik həllər ön plana çıxır. Ölkənin bir çox bölgəsində istifadə olunan kotatsu buna ən məşhur nümunələrdən biridir. Altında elektrikli isidici olan alçaq masanın üstü yorğanla örtülür və insanlar bu isti sahənin ətrafında toplaşaraq isinirlər.
Bundan əlavə elektrikli xalçalar, isidici yorğanlar, portativ (daşınan) isidicilər və termal geyimlər də yaponların gündəlik həyatının mühüm hissəsidir. Bu şəkildə enerji istehlakı aşağı səviyyədə saxlanılır, eyni zamanda fərdi rahatlıq təmin olunur.
Yaponiyada mərkəzi istiliyin geniş yayılmamasının arxasında təkcə mədəni vərdişlər deyil, həm də coğrafi və memarlıq səbəbləri dayanır. Ölkə tez-tez zəlzələlərlə qarşılaşdığı üçün binalar yüngül materiallarla inşa edilir. Bu isə Qərb ölkələri ilə müqayisədə izolyasiyanın daha zəif olmasına səbəb olur, lakin yaponların isınma vərdişləri bu çatışmazlığı praktik üsullarla kompensasiya edir.
