Bu çərəzlər marketlərdən yığışdırılır

Almaniyada satılan türk markalı günəbaxan çərəzi məhsullarında qanuni həddən artıq kif toksini aşkarlanması səbəbindən iki partiya təcili şəkildə raflardan yığışdırılır. Mütəxəssislər istehlakçıları bu məhsulları qətiyyən istifadə etməmələri barədə xəbərdar ediblər.

Xpress.az xəbər verir ki, Almaniyada bir çox market zəncirində satılan türk markası Dolunay-a aid günəbaxan çərəzi məhsulları üçün genişmiqyaslı geri çağırma prosesi başlanılıb. Aparılan yoxlamalarda iki fərqli partiyada qanuni limitləri aşan kif toksini — okratoksin A (OTA) aşkar edildiyi açıqlanıb.

İstehsalçı və distribyutor şirkət Göral Vertriebs GmbH tərəfindən verilən açıqlamada, sözügedən məhsulların qətiyyən istehlak edilməməsi vurğulanıb. Federal İstehlakçı Qoruma və Qida Təhlükəsizliyi İdarəsi (BVL), geri çağırılan məhsulların Bremen, Hessen, Aşağı Saksoniya və Şimali Reyn-Vestfaliya bölgələrindəki müxtəlif marketlərdə satıldığını təsdiqləyib.
    •    Dolunay Ay Çekirdeği (qabıqlı – qovrulmuş – duzsuz) – 250 q
Son istifadə tarixi: 24.08.2026
Partiya nömrəsi: L 03700604
    •    Dolunay Ay Çekirdeği (qabıqlı – qovrulmuş – duzlu) – 500 q
Son istifadə tarixi: 01.02.2027
Partiya nömrəsi: L 14602009

Okratoksin A bəzi kif növlərinin yanlış yığım, qeyri-kafi saxlanma və ya işləmə şəraitində istehsal etdiyi mikotoksindir. Xüsusilə böyrəklərdə qalıcı zədə yarada bildiyi üçün Avropa Birliyi tərəfindən ciddi şəkildə məhdudlaşdırılıb. Limitlərin aşılması halında məhsulların bazardan çıxarılması məcburi sayılır. BVL, təhlükə aşkar edilən partiyaların “sürətlə raflardan yığışdırıldığını” açıqlayıb.

İstehlakçılara evlərindəki məhsulların son istifadə tarixi və partiya nömrəsini yoxlamaları tövsiyə olunur. Əgər məlumatlar uyğun gəlirsə:
    •    Məhsulu istehlak etməyin,
    •    Aldığınız marketə qəbz olmadan geri qaytarın,
    •    Məhsulun dəyəri tam şəkildə geri ödəniləcək.