Əlilliyi olan şəxslər üçün hansı İMKANLAR yaradılır?
Xəbər verildiyi kimi, son bir ildə Dövlət Məşğulluq Agentliyi əlilliyi olan 5800 şəxsi işlə təmin edib. Ötən il bu kateqoriyaya aid 1284 şəxs üçün özünüməşğulluq proqramı çərçivəsində kiçik ailə təsərrüfatları yaradılıb. Statistikalar əlilliyi olan şəxslər üçün müsbət bir mənzərə ortaya qoyur.
Bəs, ümumilikdə, əlilliyi olan şəxslərin cəmiyyətə inteqrasiyası yönündə hansı işlər aparılır?
Mövzu ilə bağlı Bizim.Media-ya danışan Milli Məclisin deputatı, iqtisadçı ekspert Vüqar Bayramovun sözlərinə görə, əlilliyi olan şəxslərin reabilitasiyası, sosial müdafiəsi, cəmiyyətə inteqrasiyası tədbirləri və məşğulluğunun təminatı istiqamətində vacib işlər aparılır:
“İnklüziv inkişaf Azərbaycanda əsas hədəflərdən biridir. Eyni zamanda, əlilliyi olan vətəndaşlarımızın da cəmiyyətə inteqrasiyası və işlə təmin olunması nəzərdə tutulur. Əlilliyi olan şəxslərin əmək bazarına çıxışlarının asanlaşdırılması məqsədilə onlar üçün peşə hazırlığı kurslarının təşkili həyata keçirilir.
Son bir ildə əlilliyi olan 500-dək şəxs peşə kurslarına cəlb olunub. Kursları uğurla başa vurmuş şəxslərin işlə təminatına da dəstək göstərilib. Amma qanunvericiliyə əsasən, əlilliyi olan şəxslərlə bağlı iş yerlərinin kvotaları var”.
Deputat qeyd edir ki, vacib məqamlardan biri də əlilliyi olan vətəndaşlarımızın daha yaxşı təhsil almasıdır. Bu sahədə onların həm əyani, həm də distant şəkildə işləməsi mümkün ola bilər. Eyni zamanda, ixtisaslı kadr kimi onlara olan tələbi artıra bilər:
“Bu baxımdan, əlilliyi olan şəxslərin orta məktəb və universitetlərdə keyfiyyətli təhsil alması üçün infrastruktur təkmilləşdirilməlidir. Çünki praktiki olaraq həmin vətəndaşların cəmiyyətə inteqrasiyası və karyerası birbaşa olaraq onların təhsil səviyyəsindən asılıdır. Bir sıra ölkələrdə əlilliyi olan şəxsləri daha çox işə cəlb edən şirkətlər üçün müəyyən güzəştlər və subsidiyalar tətbiq olunur. Oxşar praktikanın Azərbaycanda da tətbiqinə baxıla bilər. Amma bütövlükdə inklüziv olaraq əlilliyi olan şəxslərin cəmiyyətə daha yaxından inteqrasiyası ilə bağlı işlərin sürətlənməsi müşahidə olunur”.
