Bu barədə Oxu.Az-a müraciət edən vətəndaş vurğulayıb ki, daha əvvəl Nizami Tibb Mərkəzinin tibbi rəyi əsasında müddətli həqiqi hərbi xidmətə yararsız və çağırışdan azad olunma qərarı verilib.
O, iddia edib ki, daha sonra DTSERA-da aparılmış müayinə nəticəsində eyni diaqnoz üzrə "hərbi xidmətə yararlıdır" qərarı çıxarılıb.
Onun skoliozdan əziyyət çəkdiyi bildirilir.
Buna qədər üç hərbi həkim yoxlanışından keçən İ.Gülüşov qeyd edib ki, hazırkı verilən qərar anlaşılmazdır və bununla bağlı müvafiq qurumlara şikayət edəcək.
Məsələ ilə bağlı Səfərbərlik və Hərbi Xidmətə Çağırış üzrə Dövlət Xidmətinə sorğu ünvanlanıb.
Qurumun İctimaiyyətlə iş və beynəlxalq əlaqələr şöbəsinin rəisi Pərviz Sədrəddinov Oxu.Az-a açıqlamasında bildirib ki, həqiqi hərbi xidmətə çağırılanların tibbi şəhadətlənləndirilməsi üzrə yekun tibbi müayinə DTSERA tərəfindən aparılır.
"Yekun tibbi müayinəni nazirliyin tabeliyindəki DTSERA hərbi həkim komissiyalarının tibbi müayinəsinin nəticələri və müddətli həqiqi hərbi xidmətə çağırılan vətəndaşların əyani tibbi müayinəsi əsasında aparır.
Prosedur aşağıdakı qaydada aparılır:
• Çağırışçıya dair verilmiş rəy Mərkəzi Hərbi Həkim Komissiyası tərəfindən təsdiqləndiyi halda çağırışçının yekun tibbi müayinəsinin aparılması üçün e-sistem üzərindən agentliyin "Vətəndaşların qəbulu" altsisteminə göndəriş (Forma 44) daxil edilir;
• Göndəriş əsasında çağırışçı üçün əyani müayinəyə elektron növbə təyin edilir;
• Növbəlilik əsasında çağırışçılar agentliyin həkimləri tərəfindən əyani şəkildə tibbi müayinələrdən keçirilir;
• Müayinəyə dair qəbul edilmiş qərar elektron sistemə daxil edilir və qərar barədə çağırışçıya elektron qaydada məlumat verilir.
Onu da bildirək ki, çağırışçı yekun tibbi müayinəyə dair qəbul edilmiş qərarla razılaşmadığı halda, o, Əmək və Əhalinin Sosial Müdafiəsi Nazirliyinin tərkibində yaradılmış "Çağırışçıların şəhadətləndirilməsi üzrə yekun tibbi müayinəyə dair qəbul edilmiş qərarlardan verilən şikayətlərə baxan Apellyasiya Şurası"na müraciət ərizə ilə müraciət edə bilər", - deyə qurum rəsmisi bildirib.
