“Sea Breeze”də binalar tikdirən “Nardaran İnvest” böyük məbləğdə CƏRİMƏLƏNDİ
“Sea Breeze” istirahət zonasının ərazisində çoxsaylı yaşayış binaları tikdirən “Nardaran İnvest” Məhdud Məsuliyyətli Cəmiyyəti inzibati məsuliyyətə cəlb edilib.
MMC barəsində İnzibati Xətalar Məcəlləsinin 469-1-ci (İstehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığortalanmanın təmin edilməməsi) maddəsi ilə protokol tərtib edilib.
Əmək və Əhalinin Sosial Müdafiəsi Nazirliyi yanında Dövlət Əmək Müfəttişli Xidmətinin Bakı şəhər İdarəsi tərəfindən tərtib edilən protokol baxılması üçün Nəsimi Rayon Məhkəməsinə göndərilib. Məhkəmənin qərarı ilə “Nardaran İnvest” 5 min manat cərimə edilib.
Həmin qərardan narazı qalan şirkətin direktoru apellyasiya qaydasında şikayət verib. Şikayətdə qeyd olunub ki, MMC tərəfindən heç bir qanun pozuntusuna yol verilməyib. Bundan əlavə qeyd edilib ki, barəsində inzibati xəta haqqında iş üzrə icraat aparılan hüquqi şəxs “Nardaran İnvest” MMC-nin hüquqi ünvanı Bakı şəhəri, Sabunçu rayonu ərazisində yerləşməsinə baxmayaraq, inzibati xəta haqqında protokol qanunvericiliyin tələblərinə zidd olaraq Nəsimi Rayon Məhkəməsinə göndərilib. Bakı Apellyasiya Məhkəməsinin qərarı ilə şirkət rəhbərliyi tərəfindən verilən şikayət təmin edilməyib.
