ABŞ-İran münaqişəsi nə vaxt bitəcək?
ABŞ yaxın iki həftə ərzində İrana qarşı hərbi əməliyyatları davam etdirmək üçün ciddi sursat çatışmazlığı ilə üzləşə bilər.
Xpress.az xəbər verir ki, bu barədə Rusiyanın hərbi eksperti, Osnovanie Tarixi Tədqiqatlar Fondunun prezidenti Aleksey Anpiloqov “Abzats” nəşrinə müsahibəsində bildirib.
Ekspertin sözlərinə görə, Vaşinqtonun vəziyyəti yüksək dəqiqlikli silahların məhdud ehtiyatı səbəbindən çətinləşir. 2025-ci ilə olan təxmini hesablamalara görə, ABŞ arsenalında təxminən 4000 ədəd Tomahawk qanadlı raketi mövcuddur. Lakin Pentaqon hər il cəmi 50–90 ədəd yeni raket sifariş edir.
Anpiloqov qeyd edib ki, belə istehsal tempi genişmiqyaslı hərbi əməliyyatlar zamanı sursat ehtiyatlarının sürətlə tükənməsinə səbəb ola bilər. O əlavə edib ki, ABŞ-ın Çinlə mümkün münaqişə ssenariləri üzrə apardığı qiymətləndirmələr də göstərib ki, kruiz raket ehtiyatları cəmi bir neçə həftəyə kifayət edə bilər.
Ekspertin fikrincə, dağlıq relyefə malik olan İranda raket qurğularının gizlədilməsi mümkündür və yüzlərlə “Tomahawk” raketi belə əsas hərbi obyektlərin tam məhv edilməsinə və hava üstünlüyünün təmin olunmasına zəmanət vermir.
Anpiloqov həmçinin vurğulayıb ki, İran itirilmiş silahları qısa müddətdə bərpa etmək imkanına malikdir. Onun sözlərinə görə, Tehran Pakistan vasitəsilə Çindən hava hücumundan müdafiə sistemləri və digər hərbi texnika əldə edə bilər. Bundan əlavə, İran münaqişə zonasını genişləndirərək Fars körfəzi ölkələrini də prosesə cəlb etməklə ABŞ üçün əlavə təzyiq yarada bilər.
Ekspert əlavə edib ki, ABŞ-ın geniş JDAM idarəolunan bomba ehtiyatı var. Bu sursat daha ucuz və geniş yayılmışdır. Lakin onların effektiv istifadəsi üçün əvvəlcə hava üstünlüyü təmin edilməlidir ki, hazırkı şəraitdə bu üstünlük koalisiya qüvvələrində mövcud deyil.
Beləliklə, ekspert hesab edir ki, ABŞ-İran qarşıdurmasının uzunmüddətli və intensiv hərbi fazada davam etməsi sursat balansı baxımından Vaşinqton üçün ciddi çətinliklər yarada bilər.
