İranın xəyanətkar hücumuna İctimai Şuradan ETİRAZ - BƏYANAT
“İran İslam Respublikası tərəfindən Azərbaycanın Naxçıvan Muxtar Respublikası ərazisinə edilmiş dron hücumlarını qətiyyətlə pisləyir, bunu ölkəmizin ərazi bütövlüyünə və suverenliyinə, dinc sakinlərə qarşı məqsədli terror aktı, xain hücum kimi qiymətləndiririk. Hesab edirik ki, Azərbaycanın cənub qonşusuna münasibətdə mehriban qonşuluq, sərhədlərin toxunulmazlığı, xalqlarımızın əmin-amanlıq və sülh şəraitində yaşaması istiqamətində yürütdüyü siyasətə qarşılıq olaraq İranın bu xəyanətkar addımı yolverilməzdir”.
Xpress.az xəbər verir ki, bu barədə Qaçqınların və Məcburi Köçkünlərin İşləri üzrə Dövlət Komitəsi yanında İctimai Şuranın yaydığı bəyanatda qeyd olunub.
Şura üzvləri bəyanatda Azərbaycanın ayrılmaz tərkib hissəsi olan Naxçıvan Muxtar Respublikasına İran tərəfindən edilən dron hücumlarına qəti etirazlarını ifadə ediblər.
Bildirilib ki, Azərbaycanın suveren ərazisinə edilən bu hücumlar, nəticədə mülki insanların müxtəlif dərəcədə xəsarət alması beynəlxalq hüququn norma və prinsiplərinə ziddir. Rəsmi Tehran regionda gərginliyin artmasına xidmət edən bu kimi hərəkətlərdən çəkinməli, Azərbaycan xalqından və dövlətindən üzr istəməli, terror aktına yol verən şəxsləri məsuliyyətə cəlb etməklə ədalətli yanaşma ortaya qoymalıdır.
